ԵԱՀԿՆ-ն ողջունում է Հայաստանի և Ադրբեջանի միջև խաղաղության հնարավոր համաձայնագրի գործընթացի մեկնարկը

ԵԱՀԿ նախագահությունը ողջունում է Եվրոպական խորհրդի նախագահի հովանու ներքո Հայաստանի և Ադրբեջանի ղեկավարների հանդիպումը։ Այս մասին նշվում է ԵԱՀԿ Լեհաստանի նախագահության հայտարարության մեջ, որը հրապարակվել է Twitter-ում։

Ըստ հաղորդագրության՝ նախագահությունը ողջունում է նաև «խաղաղության հնարավոր համաձայնագրի հասնելու գործընթացի մեկնարկը»։

«Նախագահությունը պատրաստ է աջակցել Հարավային Կովկասում կայուն և խաղաղ միջավայր ապահովելու բոլոր ջանքերին»,- ասվում է հայտարարությունում։

Հիշեցնենք՝ ապրիլի 6-ին Բրյուսելում Եվրոպական խորհրդի նախագահ Շառլ Միշելի միջնորդությամբ տեղի է ունեցել Փաշինյան-Ալիև հանդիպում, որի շրջանակում որոշվել է մինչև ապրիլի վերջ սահմանազատման հարցերով հանձնաժողով ստեղծել, ինչպես նաև 2 երկրների ԱԳ նախարարներին հանձնարարվել է սկսել խաղաղության պայմանագրի նախապատրաստման աշխատանքները։