Իրենց բերած կեղծ խաղաղությունից արյան հոտ է գալիս. Հայկ Մամիջանյան

Ես եկել եմ ոչ թե ելույթ ունենալու, այլ զրուցելու այն մարդկանց հետ, որոնք անձրեւի տակ, ձյան տակ պայքարել են շատերի փոխարեն, բայց բոլորի համար: Այս մասին այսօր՝ ապրիլի 5-ին, Ազատության հրապարակում ընդդիմության հանրահավաքի ժամանակ հայտարարեց «Պատիվ ունեմ» խմբակցության պատգամավոր Հայկ Մամիջանյանը:

«Այստեղ կանգնած մարդիկ հասկանում են, որ Հայաստանն Արցախի անվտանգության երաշխվորն է, բայց նույնքան էլ Արցախը Հայաստանի անվտանգության գրավականն է: Այնտեղ կասկադում իրար ձեռք-ձեռքի բռնած սիրահար զույգի անվտանգության երաշխավորը Արցախի սահմանին ավտոմատը պինդ բռնած զինվորն է: Իսկ այ իշխանությունը չի համարձակվում ասել, որ մեր հայրենիքը օկուպացված է: Վախենում են օկուպանտից: Սխալվում են, պետք է վախենան նրանցից, որոնք երկու անգամ ու դեռ շատ անգամներ ծնկի են բերելու օկուպանտին»:

Նա դիմեց զոհերի հարազատներին. «Ես եկել եմ ներողություն խնդրեմ, որ ես կամ, իսկ իրենք չկան: Եկել եմ ասեմ, որ իրենց հերոս զավակների պահած հողը պատառ-պատառ իրենց մեջքի հետեւից ծախում են: Սուտ է, իրենց բերած կեղծ խաղաղությունից արյան հոտ է գալիս: Ու այդ ծախելն անում են դեմքի այնպիսի արտահայտությամբ, կարծես բոլորիս փրկություն են բերել: Մի բան էլ մեր վրա են մուննաթ գալիս: Եկել եմ զրուցեմ պայքարից հիասթափված մեր ընկերների հետ: Մարդկանց հետ, որոնք հասկանում են, որ Արցախի խնդրի լուծման բանալին Բրյուսելում, Վաշինգտոնում ու Բրյուսելում չէ, այլ Երեւանում: Բայց մարդիկ հոգնել են անհաջողություններից, մեզ դժվար են հավատում: Կներեք, բայց դուք ինքներդ ձեզ պետք է հավատաք:

Գուցե ընդդիմությունը շատ սխալներ ունի, բայց ճանապարհից հետ կանգնելու տարբերակ չկա: Ես դիմում եմ երկրից արտագաղթող մարդկանց: Ախր ուր եք փախչում, լավ, որ ձեր տանը կռիս ու տառական է հայտնվում, տնից փախնում ե՞ք: Չէ, քշում եք կտռիսին ու տառականին: Ես եկել եմ զրուցեմ մեր քույրերի ու եղբայրների հետ, որոնք 2018-ին ասում էին՝ Արցախը տնք, հանգիստ ապրենք, որոնք ուրախացան սեփական կետից բանակցություն սկսողից: 4 տարի անց ոչ միայն Արցախը բանակցային սեղանին չի, այլ Հայաստանը բանակցային սեղանին չի, առանց մեզ մեր ապագան են որոշում: Խաբվեցին բոլոր նրանք, որոնք երկրորդ շանսը տվեցին այս խւնտային անցած տարի հունիսին, հավատացին խաղաղությանը: Բայց մենք նորից հայրենիք ենք կորցրել Ներքին Հանդում, Փառուխում, Քարագլխում»:

Հայկ Մամիջանյանը հայտարարեց, որ Արցախի խնդրի հայանպաստ լուծման միակ տարբերակը Մինսկի խմբի համանախագահների կողմից հայտարարված հիմնարար սկզբունքներն են. «Եթե էս չմարդը սկի Հայաստանում դրանից չի խոսում, դրսում, Բրյուսելով ո՞նց է դրանից խոսելու: Դուք ինձ հիմա կհարցնեք՝ ինչի՞ ես վստահ, որ այս անգամ հաջողության ես հասնելու: Ես մի բան գիտեմ, որ չպայքարենք, հաստատ հաջողության չենք հասնի: Ամեն ոտքի կնգնող հայը շանս է, ամեն դիվանից վեր կացող ու փողոց իջնող հայը շանս է: Ընտանիքում, աշխատավայրում, փողոցում քարոզող հայը շանս է: Մեզ մի բան է մնում՝ հավատալ իրար: Ախր մենք իրար խաբել չենք կարող: Մենք չենք կարող պարտվել, որովհետեւ կորցնելու բան էլ չունենք, հայրենիքից թանկ ի՞նչ պետք է կորցնենք, ինչի՞ց վախենանք, բանտի՞ց, տուգանքի՞ց: Մենք չենք վախենալու»: