Թուրքը նենգ ձևով Փառուխում հատել է շփման գիծը և ուզում է առաջ շարժվել. Մետաքսե Հակոբյանը մանրամասներ է հայտնում Փառուխ գյուղում տիրող իրավիճակից

Թուրքը նենգ ձևով Փառուխում հատել է շփման գիծը և ուզում է շարժվել դեպի իր պլանավորված վայրը: «Փաստինֆո»-ին հայտնեց Արցախի ԱԺ պատգամավոր Մետաքսե Հակոբյանը՝ մանրամասներ ներկայացնելով այս պահին Ասկերանի Փառուխ գյուղում տիրող իրավիճակի մասին:

Նրա փոխանցմամբ՝ Փառուխ գյուղի ուղղությամբ ադրբեջանական առաջխաղացման հետևանքով արցախյան կողմը զոհեր, վիրավորներ չունի։ Այս պահին ռուսական կողմը բանակցություններ է վարում Փառուխ գյուղ մտած ադրբեջանական կողմի հետ։

«Սա արդեն ռուս խաղաղապահների գործառույթն է, տեսնենք՝ ի՞նչ արդյունք կունենան բանակցությունները, մեր կողմը չի կարող բանակցություններ այս պահին վարել, ոչ էլ մեր զինվորականները կարող են ինչ-որ քայլեր ձեռնարկել: Հուսանք ռուս խաղաղապահներին կհաջողվի հարցը կարգավորել, այլապես, մեր դառը, ցավոտ կանխատեսումները կիրականան»,-հայտնեց զրուցակիցը:

Մետաքսե Հակոբյանի խոսքով՝ բնակիչների համար է անակնկալ եղել, քանի որ կրակոցներ չեն լսել.

«Բնակիչներն էլ որևէ կրակոց չեն էլ լսել, այսինքն՝ թշնամին շատ լավ ծրագրավորված այս ամենն արել է, իրենք պաշտոնական լրահոսով անընդհատ զգուշացնում էին , եթե տողատակերը տեսնեինք, պետք է հասկանայինք, որ սա պլանավորվում է իրենց կողմից, կարծում եմ սա անակնկալ չի եղել»,-ասաց Մետաքսե Հակոբյանը:

Հիշեցնենք, որ Արցախի տեղեկատվական շտաբը տեղեկացրել է, որ այսօր՝ մարտի 24-ին՝ ժամը 16:00-ի դրությամբ, Ադրբեջանի զինված ուժերն Ասկերանի շրջանի Փառուխ գյուղի ուղղությամբ խախտել են շփման գիծը: Անվտանգության նկատառումներից ելնելով այս պահին տարհանվել են Ասկերանի շրջանի Խրամորթ համայնքի կանայք և երեխաները:

ՀՀ ԱԺ պատգամավոր Տիգրան Աբրահամյանը հայտնել է, որ ադրբեջանցիները ներթափանցելով Փառուխ գյուղ՝ փորձում են առաջանալ Քարագլուխ ռազմավարական բարձունքի ուղղությամբ։