Առաջարկում եմ Աղդամում հիմնել Քաղաքացիական պայմանագիր անվանումով բնակավայր

Անդրանիկ Քոչարյանը գազի տեսուչի հայացքով հայտարարում է, թե մենք պետք է սովորենք ապրել նաեւ առանց գազի։ Իհարկե, ես կողմ եմ, որ Քոչարյան Անդրանիկի եւ եվրոպական խաղաղության ճամբարներում ադրբեջանցիների հետ խաղաղության փարթիներ արած բոլոր իշխանականների գազի վինտիլները փակեն։

 

Սա սադիզմ չէ։ Նրանք պիտի սովորեն ապրել իրենց արած անամոթ հայտարարությունների իրականության մեջ։

 

Բայց, դա հարցի լուծում չէ, հատկապես, որ նրանցից առավել թրքահմայվածները պատրաստ են կլոր կամ քառակուսի սեղանի շուրջ քննարկել Արցախը Ադրբեջանի կազմում լինելու հնարավորության բոլոր երանգները։

 

Վիդիտե լի, նրանք վստահ են, որ Ալիեւը ապահովելու է արցախցիների անվտանգությունը, քանզի, ինչպես կարծում է մեր օրերի Սպինոզա Հովիկ Աղազարյանը, մենք մի քիչ չափազանցնում ենք ադրբեջանական ագրեսիայի թեման։

Եւ այսպես՝ մեկ ռացիոնալ առաջարկ Ալիեւի անվտանգության երաշխիքներին քնքշաբարո հավատացողներին։ Առաջարկում եմ Աղդամում հիմնել Քաղաքացիական պայմանագիր անունը կրող բնակավայր եւ իրենց բոլորին, ընտանիքներով, երեխաներով, կատուներով, դաշնամուրով, լվացքի մեքենայով ու պլյաժի չստիկներով տեղափոխել Ադրբեջանի անվտանգ ու ապահով վերահսկողության տակ։

 

Ու մենք գործնական հնարավորություն կունենանք համոզվելու, թե ինչպես է Իլհամ Հեյդարովիչը ապահովում իր իսկ խոստացած անվտանգությունը։

 

Ինչ վերաբերում է գազամատակարարման դադարեցմանը, ապա քիչ առաջ կրկին խոսել եմ Արցախի իմ գործընկերների հետ. բանակցությունները ադրբեջանցիների հետ ոչ մի արդյունք չեն տվել, գազ չկա, էլեկտրականությունը չի դիմանում ծանրաբեռնվածությանն ու Արցախում, որտեղ գիշերը մինուս 3 է, նաեւ հոսանքի պարբերական անջատումներ են։ Բոլորի տներում փայտի վառարաններ են եւ արդեն կա նաեւ վառելափայտի լուրջ խնդիր։

 

Բայց, թեմայից չշեղվենք. առաջարկս ուժի մեջ է` ստեղծել Քաղաքացիական պայմանագիր բնակավայր եւ բոլորին տեղափոխել Ադրբեջանի հոգատար ու ապահով գիրկը։ Աղդամի շրջանի Քաղաքացիական պայմանագրի վարչական շրջանի ղեկավար էլ կարելի է նշանակել Անդրանիկ Քոչարյանին։

 

Ինքը Շիրակում աշխատած տարիներից բարեգործական օգնությունը «տեղաբաշխելու» մեծ փորձ ունի։