Վենետիկի հանձնաժողովը մտահոգություններ է հայտնել ԱՆ առաջարկած փոփոխությունների շուրջ
Վենետիկի հանձնաժողովը մտահոգություններ է հայտնել ՀՀ արդարադատության նախարարության կողմից առաջարկվող օրենսդրական փոփոխությունների շուրջ, որով նախարարությունն առաջարկում է սահմանել դատավորի (այդ թվում նաև՝ ՍԴ դատավորի) անհամատեղելիության պահանջների խախտման (լիազորությունների դադարեցման) նոր հիմք: Այսպես, դատավորի լիազորությունները դադարում են, եթե միջազգային դատարանի կողմից արձանագրվել է, որ վերջինս միտումնավոր կերպով խախտել է մարդու հիմնարար իրավունքները: «Լույս» հիմնադրամը հաղորդագրություն է տարածել՝ ստորև ներկայացնելով նաև Վենետիկի հանձնաշողովի մարտի 21-ին հրապարակված կարծիքը, որում հանձնաժողովը հայտնել է իր մտահոգությունները նախագծի վերաբերյալ։
«Վենետիկի հանձնաժողովը չի տեսնում առաջարկվող նախագծի անհրաժեշտությունը, քանի որ և՛ գործող, և՛ շուտով ուժի մեջ մտնող քրեական օրենսգրքերով արդեն իսկ նախատեսված են կարգավորումներ, որոնք քրեական պատասխանատվություն են սահմանում ակնհայտ անարդար դատավճռի համար:
Ավելին, Վենետիկի հանձնաժողովը ընդգծել է, թե ինչքանով կարող է «միտումնավոր խախտում» կատարած լինելու փաստը դիտարկվել որպես անհամատեղելիության պահանջի խախտում (լիազորությունների դադարման հիմք) այն դեպքում, երբ անհամատեղելիության պահանջը ենթադրում է դատավորի պաշտոնի հետ անհամատեղելի այլ գործունեությամբ զբաղվելու արգելք:
Փաստացի, Վենետիկի հանձնաժողովի կողմից բարձրացված հարցերի արդյունքում հարցականի տակ է դրվում նախագծի ամբողջ տրամաբանությունը»,- նշված է հաղորդագրությունում։
Հետևեք մեզ Facebook-ում