Արցախին գազի մատակարարում 5 կետի ընդունման դիմաց. Սա է Ադրբեջանի իրական առաջարկը Հայաստանին
Երբ շաբաթներ առաջ պայթեցվեց Արցախին մատակարարող գազամուղը, շատերը դա գնահատում էին, որպես պատասխան արցախցիների կողմից ընդունված «օկուպացված տարածքների մասին» նախագծին: Սակայն, իրականում, Ադրբեջանն այդ գազատարի պայթեցումը պլանավորել էր այլ նպատակների համար: Այսօր նա Հայաստանին է փոխանցել իր հինգ կետանոց «առաջարկները», հույս ունենալով ստիպել Երևանին ընդունել դրանք: Իսկ որպեսզի Հայաստանում հասկանան, թե ով է իրականում Արցախում տերն ու տիրակալը գազամուղի պայթեցում կազմակերպեցին, որպեսզի հայաստանցիներին հասկացնեն, որ Արցախը Ադրբեջանի ամենապարզ քմահաճույքներից է կախված և իմաստ չունի դիմադրել Բաքվին այդ հարցում: Իսկ երբ հայտնի դարձավ, որ ադրբեջանցիները որոշել են գազամուղի վրա փական դնեն, արդեն տեսանելի է դառնում, թե ինչ ծրագրեր են նրանք մշակում Արցախի հարցում:
Իրենց հինգ կետանոց «առաջարկներով», նրանք փաստացի սպառնում մեզ հետևյալ դիլեմայով՝ չեք համաձայնվում Արցախը ճանաչել Ադրբեջանի կազմում, մենք Արցախի հայ բնակչության համար կստեղծենք ապրելու անտանելի պայմաններ և այդ տեղի բնակչությունը ստիպված «ինքնակամ» կլքի իր բնակավայրը: Հասկանալի է, որ հայկական կողմը չի կարող ընդունել այդ կետերը, փաստացի համաձայնվելով, որ Արցախը մնա Ադրբեջանի կազմում: Մյուս կողմից, Նիկոլ Փաշինյանի թիմը վախենում է հրապարակավ հստակ մերժել ադրբեջանցիների այդ առաջարկը, որի պատճառով էլ առաջանում են լղոզված մեկնաբանությունները իրենց կողմից: Իսկ երբ իշխանության տեսակետը լղոզված է լինում, ապա իշխանության այս կամ այն անդամ իր ճաշակով ու պատկերացումով է դա անում: Իսկ «դուրսը» տեսնելով այս ամենը սկսում է իր հետևությունն անել: Եվ զարմանալի չէ, որ Ադրբեջանի նախագահը ԱՄՆ նախագահ Ջո Բայդենին ուղղված իր նամակում կոչ է անում աջակցել իր հինգ կետանոց առաջարկին, ուղղված Հայաստանին: Ի՞նչ պիտի պատասխանի Բայդենը, երբ նույնիսկ Հայաստանի ԱԳ նախարարն է հայտարարում, որ իրենց համար այդ կետերում «...ոչ մի անընդունելի կետ չկա...»:
Այս ամենից հետո, էլ ով կսկսի լուրջ վերաբերվել Հայաստանին, որ մի հատ էլ «հայանպաստ» դիրքով հանդես գա Արցախի ապագայի վերաբերյալ:
Սա է իրականությունը:
Դավիթ Մկրտչյան
Հետևեք մեզ Facebook-ում