Ամերիկացիները դեմ չեն պատերազմել Ռուսաստանի հետ մինջև վերջին եվրոպացին

ՄԱԿ-ում ԱՄՆ-ի ներկայացուցիչ Լինդա Թոմաս-Գրինֆիլդը հայտարարել է, որ եթե լինեն ՆԱՏՕ-ի անդամ այլ երկրներ, ովքեր պատրաստ կլինեն զինված աջակցություն ցուցաբերել Ուկրաինային, ապա Վաշինգտոնը նրանց կաջակցի: Բայց, շարունակեց տիկինը, ամերիկյան զորքեր չեն ուղարկվի Ուկրաինա և ընդհանրապես ԱՄՆ-ն անմիջականորեն չի մտնի պատերազմի մեջ:

Հիշեցնենք, որ Ուկրաինայի նախագահ Վլադիմիր Զելենսկին պարբերաբար մեղադրում է ՆԱՏՕ-ի անդամ երկրներին, որ նրանք  միայն խոսքով են  աջակցում, բայց գործնականում միայնակ են թողել Ուկրաինային Ռուսաստանի հետ պատերազմում: Իսկ երբ Լեհաստանը հայտարարեց, որ պատրաստ է տրամադրել իր կործանիչները Ուկրաինային, Մոսկվան անմիջապես հայտարարեց, որ կոչնչացնի այդ կործանիչները այն օդանավակայանում, որից նրանք կփորձեն տեաղափոխել Ուկրաինա: Որից հետո Վարշավան հայտարարեց, որ պատրաստ է իր ինքնաթիռները տրամադրել Գերմանիայում գտնվող ՆԱՏՕ-ի կողմից կառավարվող օդանավակայանին, որպեսզի այնտեղից կործանիչները հասցվեն Ուկրաինա: Սակայն Վաշինգտոնում հայտարարեցին, որ Վարշավայի այս քայլը համաձայնեցված չի եղել իրենց հետ և լեհերը ինքնուրույն պիտի լուծեն ուկրաինացիներին աջակցելու խնդիրը: Որից հետո Ուկրաինայում և մի շարք ՆԱՏՕ-ի անդամ երկրներում սկսեցին խոսել այն մասին, որ Վաշինգտոնը վախենում է ռուսների հետ բախումից և այդ իսկ պատճառով էլ «քցում է» իր դաշնակիցներին: Եվ, ահա, այսպիսի մեղադրանքներից հետո ՄԱԿ-ում ԱՄՆ-ի ներկայացուցիչը հայտարարում է, որ «...ԱՄՆ-ն դեմ չէ, որ ՆԱՏՕ-ի անդամ այլ երկիր աջակցի  Ուկրաինային, սակայն Վաշինգտոնը սեփական զորք չի ուղարկի այդ երկիր...»:

Ժողովրդական լեզվով ասած, ամերիկացիները պատրաստ են պայքարել ռուսների դեմ մինջև վերջին ուկրաինացին և նույնիսկ մինջև վերջին եվրոպացին, սակայն  ամերիկյան զինվորը անմիջականորեն պատերազմի մեջ չի մտնի ռուսների դեմ հանուն եվրոպացիների:

Հերիք է դիտարկել առաջին և երկրորդ աշխարհամարտերի փորձը, հասկանալու համար, թե ինչին է իրականում պատրաստ ամերիկացի զինվորը:

Այլ հարց է, որ ոմանք մոռանում են այդ դառը ճշմարտությունը և իրենց ժողովուրդներին  կրակի մեջ են գցում, զբաղվելով ինքնախաբեությամբ:

Սա է իրականությունը:

Արտակ Հակոբյան