Զելենսկին CNN-ի հետ զրույցում խոսել է Ուկրաինայի ինքնիշխանության և տարածքային ամբողջականության կորստի վտանգի մասին

Ուկրաինան չի կարող ընդունել ինքնիշխանության և տարածքային ամբողջականության կորուստը։ Այս մասին այսօր CNN-ին տված հարցազրույցում ասել է Ուկրաինայի նախագահ Վլադիմիր Զելենսկին՝ պատասխանելով Ռուսաստանի հետ բանակցություններում հնարավոր զիջումների մասին հարցին։

«Մենք պետք է այնպիսի մոդել գտնենք, որում Ուկրաինան չի կորցնի իր ինքնիշխանությունն ու տարածքային ամբողջականությունը։ Մենք չենք կարող համաձայնվել սրա հետ։ Բայց մենք պետք է գտնենք փոխըմբռնման նման մոդել, որպեսզի կանխենք նոր պատերազմներ մեր վերահսկողության տակ գտնվող տարածքների և ժամանակավոր օկուպացված տարածքների միջև»,- ասաց նա։

Զելենսկին նաև ասել է, որ Ուկրաինան չի ընդունի որևէ վերջնագիր։ «Սրանից միակ ելքը երկխոսությունն է»,- ասաց նա։

Հավելենք նաև, որ այսօր ի թիվս այլնի, Ուկրաինայի նախագահ Վլադիմիր Զելենսկին ստորագրել է օրենք Ուկրաինայում մարտի 26-ից 30 օրով ռազմական դրության գործողության ժամկետը երկարացնելու մասին։

«Այդ օրենքով Ուկրաինայում ռազմական դրության գործողության ժամկետը 2022թ. մարտի 26-ի ժամը 05.30-ից երկարացվում է 30 օրով»,- նշված է նախագահականի հաղորդագրության մեջ։

Zham.am