Կրեմլը կտրուկ գնահատականներ չի տա Վլադիմիր Պուտինի հասցեին Ջո Բայդենի նոր հարձակումներին, որպեսզի ԱՄՆ նախագահին ագրեսիվության չմղի, լրագրողներին ասել է ՌԴ նախագահի մամուլի քարտուղար Դմիտրի Պեսկովը, տեղեկացրել է »Ինտերֆաքս»-ը։
«Մենք իսկապես լսում եւ տեսնում ենք հայտարարություններ, որոնք փաստորեն արդեն անձնական վիրավորանքներ են նախագահ Պուտինի հասցեին»,- ասել է Պեսկովը՝ մեկնաբանելով Բայդենի նոր հարձակումը Ռուսաստանի նախագահի հասցեին։
Նրա խոսքով՝ ԱՄՆ նախագահը փաստորեն արդեն ամեն օր այդպիսի հայտարարություններ է անում։ «Հաշվի առնելով պարոն Բայդենի զայրացկոտությունը, նրա հոգնածությունը, երբեմն՝ մոռացկոտությունը, ինչն արդյունքում հանգեցնում է ագրեսիվ արտահայտություններ անելուն, մենք, հավանաբար, որեւէ կտրուկ գնահատական չենք տա, որպեսզի ավելի մեծ ագրեսիվություն չառաջացնենք»,- ասել է Պեսկովը։
Այս ամիս ավելի վաղ Բայդենը Պուտինի հասցեին նորից կտրուկ էր արտահայտվել Ուկրաինայում ՌԴ-ի գործողությունների պատճառով։ Պեսկովն այն ժամանակ ԱՄՆ նախագահի հայտարարություններն աններելի էր անվանել։
«Պարոն Բայդենի այդ հայտարարությունները միանգամայն անթույլատրելի եւ աններելի են, եւ որ գլխավորն է՝ իրավունք չունի այդպիսի հայտարարություններ անել մի պետության ղեկավար, որն ամբողջ աշխարհում երկար տարիներ ռմբակոծել է մարդկանց»,- նախօրեին ասել է Կրեմլի ներկայացուցիչը։
Հետևեք մեզ Facebook-ում