Ֆիրդուսի շուկայի աշխատակիցները քաղաքապետարանին խնդրում են մինչև դեկտեմբեր հետաձգել ապամոնտաժումը

Tert.am-ի թղթակցի հետ զրույցում Ֆիրդուսի շուկայի աշխատակիցներից մեկն ասաց, որ Երևանի քաղաքապետարանից խնդրում են մինչև դեկտեմբեր հետաձգել ապամոնտաժումը:

«Ֆիրդուսի շուկայում աշխատանքային գործունեություն ծավալելու համար, հարկեր վճարելու համար բոլորս վարկեր ենք վերցրել: Մինչև դեկտեմբեր գոնե ժամանակ է պետք վարկերը թեթևացնելու համար: Գոնե պարտքերը փակենք»,-ասաց աշխատակիցը:

Աշխատակիցներն ասում են, որ մինչև դեկտեմբեր ժամանակահատվածը չեն օգտագործելու այլ առևտրային կետեր գտնելու համար.«Մեզ համար ամենալավ շուկան սա է, այստեղ են մեր հաճախորդները գալիս»:

Այս պահի դրությամբ որոշ աշխատակիցներ բացել են իրենց տաղավարները և սպասում են քաղաքապետարանի ներկայացուցիչներին:
______________
Երևանի քաղաքապետարանի աշխատակիցները բանվորական ուժի միջոցով այսօր առավոտվանից փորձում են ապամոնտաժել Ֆիրդուսի շուկան:

Ֆիրդուսի առևտրականները հավաքվել են շուկայում և արգելում են քաղաքապետարանի աշխատակիցներին ապամոնտաժել շուկան:

Բնակիչներն ասում էին, որ ողջ քաղաքը աղբանոց է դարձել, որը չեն վերացնում, իսկ քաղաքապետարանն ընկել է շուկայի ետևից: Այս պահի դրությամբ առևտրային տաղավարները բացված չեն, նրանց չեն թույլատրում աշխատել:

«Թող գնան ու Կենտրոնը բարեկարգեն, փոխանակ դա անեն եկել և շուկան են ապամոնտաժում, որտեղ փող ենք աշխատում: Մի քիչ էլ թող մեր մասին մտածեն»,-ասաց առևտրականներից մեկը:

«Սա է իմ հաց վաստակելու միջոցը, ես ո՞նց կարող եմ չաշխատել: Պիտի աշխատեմ»,- ասաց առևտրականներից մեկը, ասելով որ պայմանագիր ունի և օրինական գործունեություն է ծավալում:

Քաղաքապետարանի աշխատակիցները հորդորում են չբացել տաղավարները.«Փակեք, ու միշտ փակ է մնալու»:

Առևտրականներից մեկն էլ հայտնեց, որ Երևանի քաղաքապետարանից խնդրել են մինչև դեկտեմբեր այդ տարածքում առևտուր իրականացնել, այնուհետև ինքնակամ կլքեն տարածքը: Նրանք հայտնում են, որ սակայն քաղաքապետարանն անգամ իրենց չի հայտնել, որ այսօր ապամոնտաժվելու է շուկան:

Հիշեցնենք, որ դեռևս հունիսի 5-ին Երևանի քաղաքապետ Տարոն Մարգարյանը տեղի ունեցած աշխատանքային խորհրդակցության ժամանակ անդրադարձել էր Ֆիրդուսի փողոցում գործող շուկայի առևտրականների հետագա գործունությանը: Քաղաքապետն ասել էր, որ հաշվի առնելով, որ առաջիկայում տվյալ տարածքում մեկնարկելու են շինարարական աշխատանքներ և հանձնարարել էր բանակցել մայրաքաղաքում գործող տոնավաճառների և շուկաների սեփականատերերի հետ՝ վերոնշյալ առևտրականների գործունեությունն առևտրային այլ տարածքներ տեղափոխելու համար: