Ադրբեջանցիների արձակած ականներն ընկել են խաղողի այգիների մեջ, որտեղ այդ պահին գյուղացիներն էին աշխատում

Այսօր, ժամը 15։00-ի սահմաններում ադրբեջանցի զիծառայողները ականանետով կրակել են Արցախի Մարտունու շրջանի Խնուշինակ գյուղի ուղղությամբ։ Այս մասին «Փաստինֆո»-ին հայտնել է Մարտունու շրջանի վարչակազմի ղեկավարի տեղակալ Մասիս Զարգարյանը։

«Դեպքը տեղի է ունեցել մոտ մեկ ժամ առաջ։ Ականներն ընկել են համայնքին պատկանող խաղողի այգիների մեջ։ Գյուղացիները այդ ժամանակ աշխատում էին այնտեղ։ Աշխատողների մի մասը դեպքից հետո դուրս է եկել այգիներից, բայց մյուսները շարունակում են աշխատել։ Այնպես որ, ոչ մի խուճապ չկա»,-«Փաստինֆո»-ին ասաց Մասիս Զարգարյանը։

Վերջինս նաև հայտնեց, որ, ադրբեջանցիների հանցավոր արարքից, բարեբախտաբար, ոչ ոք չի տուժել։

Արցախի ՊԲ-ի տարածած պաշտոնական հաղորդագրության համաձայն՝ ադրբեջանցիները կիրառել են 60 մմ տրամաչափի ականանետ։ Արձակվել է 4 հատ ական։

Քիչ առաջ Նաիրի Հոխիկյանի գրառումից հայտնի դարձավ, որ ադրբեջանցիները գրեթե միաժամանակյա կրակ են բացել նաև Երասխի հատվածում տեղակայված հայկական ԶՈՒ ստորաբաժանումների ուղղությամբ։