«Վաղարշ և որդիներ կոնցեռն»-ի աշխատակիցը կտրած-ծակած վերքով տեղափոխվել է հիվանդանոց

SHAMSHYAN.com-ի տեղեկություններով՝ ոստիկանության Էրեբունու բաժնի հետաքննական բաժանմունքում նյութեր են նախապատրաստվում փետրվարի 27-ին «Մուրացան» հիվանդանոցային համալիրից ոստիկանության Էրեբունու բաժին ստացած ահազանգի փաստով:

Այդ օրը՝ ժամը 22:50 –ի սահմաններում նշված հիվանդանոցից Էրեբունու ոստիկանություն տեղեկացրել են, որ «գոտկային շրջանի կտրած-ծակած վերք» ախտորոշմամբ իրենց մոտ է տեղափոխվել մի քաղաքացի: 5 րոպե անց «մեջքի շրջանի կտրած-ծակած վերք» ախտորոշմամբ իրենց մոտ է տեղափոխվել մեկ այլ քաղաքացի:

Shamshyan.com-ի հաղորդմամբ՝ հիվանդանոց է մեկնել ոստիկանության Էրեբունու բաժնի օպերատիվ խումբը՝ բաժնի պետ Արմեն Գասպարյանի գլխավորությամբ:

Ոստիկանները պարզել են, որ առաջին տեղափոխված վիրավորը Երևանի բնակիչ, 28-ամյա Վազգեն Եղիազարյանն է, իսկ երկրորդ տեղափոխվածը՝ Կոտայքի մարզ բնակիչ, 24-ամյա Արսեն Պարազյանը:

Վերջիններս հայտնել են, որ վնասվածքները ստացել են նույն օրը՝ ժամը 22:00–ի սահմաններում Նար-Դոսի փողոցի հասցեներից մեկում եղած ավտոտնակում մարմնամարզություն կատարելու ժամանակ ավտոտնակի փոսի մեջ ընկնելու հետևանքով:

Էրեբունու ոստիկանները պարզել են, որ նշված հասցեն վարչական տարածքայինով հաշվառված է ոստիկանության կենտրոնական բաժնում և նախապատրաստված նյութերը փոխանցվել են կենտրոնի ոստիկանություն:

Ոստիկանները ունեն նաև լուրջ կասկածներ, որ նրանց հայտնած տեղեկությունը գուցե հավաստի չէ: Աղբյուրի տեղեկություններով՝ վիավորներից Վ. Եղիազարյանը աշխատում է «Վաղարշ և որդիներ կոնցեռն» ՍՊԸ-ում: