«Զելենսկին կարող է վայր դնել զենքերը, և այդ ժամանակ զոհեր չեն լինի». Դմիտրի Պեսկով

ՌԴ նախագահ Վլադիմիր Պուտինին զեկուցվել է նախօրեին կայացած ռուս-ուկրաինական բանակցությունների արդյունքների մասին, սակայն գնահատական տալու համար դեռ վաղ է, լրագրողներին ասել է պետության ղեկավարի մամուլի քարտուղար Դմիտրի Պեսկովը, գրում է ՏԱՍՍ-ը։

«Իհարկե, նախագահը տեղեկացված է»,- ասել է նա․ «Մեդինսկին անձամբ է զեկուցել, ընդ որում՝ գրավոր»։

Պեսկովը նշել է՝ հիմա դեռ վաղ է գնահատականներ տալը․ «Մենք չէինք ցանկանա դա անել ժամանակից շուտ: Մենք պետք է վերլուծենք դրանք, իսկ հետո մտածենք ապագայի մասին»։

Հարցին՝ ինչպես է Կրեմլը գնահատում ռազմական գործողության հաջողությունը, Պեսկովը նշել է․ «Մենք իրավասու չենք որևէ գնահատական տալու։ Հատուկ գործողության ընթացքը բացառապես պաշտպանության նախարարության իրավասությունն է»,- ասել է Կրեմլի խոսնակը՝ խորհուրդ տալով մեկնաբանությունների համար կապ հաստատել երկրի ՊՆ-ի հետ։

«Ռուսական զորքերը հատուկ գործողության ընթացքում ոչ մի հարված չեն հասցնում քաղաքացիական ենթակառուցվածքներին և բնակելի համալիրներին, դա բացառվում է»,- ասել է նա՝ պատասխանելով հարցին, թե արդյոք Կրեմլը տեղյա՞կ է հատուկ գործողության ընթացքում քաղաքացիական զոհերի մասին։

Պեսկովն ընդգծել է, որ խոսքը միայն Ուկրաինայի ապառազմականացման մասին է, հարվածներ են հասցվում բացառապես ռազմական օբյեկտներին։ 

Նա նաև նշել է, որ Զելենսկին կարող է, որպես պետության ղեկավար, վայր դնել զենքերը, և այդ ժամանակ զոհեր չեն լինի, հայտարարել է ՌԴ նախագահի մամուլի քարտուղար Դմիտրի Պեսկովը։

Zham.am