Եվս երկու գրավված բնակավայր. ՌԴ ՊՆ վերջին տվյալները

Ռուսաստանի ռազմածովային ուժերը ոչնչացրել են Ուկրաինայի ռազմածովային ուժերի 8 ռազմական նավ։ Ուկրաինայում ռազմական գործողություններն անցած գիշերվա ընթացքում շարունակվել են: ՌԴ պաշտպանության նախարարության տվյալներով՝ Դոնեցկի և Լուգանսկի Ժողովրդական Հանրապետությունների զինված ուժերը գրավել են Բախմուտովկա և Գրեչիշկինո բնակավայրերը։ Նախարարության պաշտոնական ներկայացուցիչը նոր տվյալներ է ներկայացրել ոչնչացված զինտեխնիկայի և ռազմական ենթակառուցվածների վերաբերյալ:

«Դոնեցկի և Լուգանսկի Հանրապետություների զինված կազմավորումները, Ռուսաստանի զինված ուժերի կրակային աջակցությամբ, մեկ օրում ընդլայնել են ներխուժումները հակառակորդի պաշտպանական տարածքներ և շարունակում են զարգացնել հարձակողական հաջողություններ:

Լուգանսկի Ժողովրդական Հանրապետության զորքերը խորացել են 30 կիլոմետր և գրավել Բախմուտովկա և Գրեչիշկինո բնակավայրերը։

Դոնեցկի Ժողովրդական Հանրապետության կազմավորումներն ու զորամասերը, առաջ շարժվելով Նովոմայսկոյեի ուղղությամբ, առաջ են գնացել ևս 6 կիլոմետր։

Ազգայնական գումարտակները, նահանջելով, պայթեցնում են էլեկտրական ենթակայաններն ու իրենց ետևում գտնվող գետերի կամուրջները։

Ռուսաստանի զինված ուժերի ստորաբաժանումները լիակատար վերահսկողություն են հաստատել Մելիտոպոլ քաղաքի վրա։ Ռուս զինծառայողները ձեռնարկում են բոլոր միջոցները՝ խաղաղ բնակչության անվտանգությունն ապահովելու և ուկրաինական հատուկ ծառայությունների և ազգայնականների կողմից սադրանքները բացառելու համար»,- ասել  ՌԴ ՊՆ պաշտոնական ներկայացուցիչ Իգոր Կոնաշենկովը։

Նաև նշել է, որ գիշերը ՌԴ ԶՈՒ-ն հարվածներ է հասցրել հեռահար ճշգրիտ զինատեսակներով՝ օդային և ծովային թեւավոր հրթիռներով ուկրաինական ռազմական ենթակառուցվածքի օբյեկտների ուղղությամբ։

«Եվս մեկ անգամ շեշտում եմ, որ հարվածներ հասցվում է միայն Ուկրաինայի զինված ուժերի ռազմական ենթակառուցվածքի օբյեկտների վրա՝ բացառելով բնակելի և սոցիալական ենթակառուցվածքների վնասները։

Ընդհանուր առմամբ, Ռուսաստանի զինված ուժերը խոցել են Ուկրաինայի ռազմական ենթակառուցվածքի 821 օբյեկտ։

Դրանց թվում՝ 14 ռազմական օդանավակայան, 19 հրամանատարական կետ և կապի կենտրոն, 24 «Ս-300» և «Օսա» զենիթահրթիռային համակարգեր, 48 ռադիոտեղորոշիչ կայան։

Խոցվել է 7 մարտական ​​ինքնաթիռ, 7 ուղղաթիռ, 9 անօդաչու թռչող սարք։

Ոչնչացվել է 87 տանկ և այլ զրահատեխնիկա, համազարկային կրակի 28 կայանք, 118 միավոր հատուկ ռազմական մեքենա։

Ռուսաստանի ռազմածովային ուժերը ոչնչացրել են Ուկրաինայի ռազմածովային ուժերի 8 նավ»,- ասել է ՌԴ ՊՆ ներկայացուցիչը։