Երևանից դեպի Կիև և Կրասնոդար չվերթները դեռևս չեն չեղարկվել

«Զվարթնոց» միջազգային օդանավակայանից այսօր՝ փետրվարի 24-ին՝, ժամը 19։05-ին եւ 23։25-ին, դեպի Կրասնոդար երկու չվերթ է լինելու։ Ժամը 20։40-ին չվերթն է նախատեսված նաեւ դեպի Ուկրաինայի մայրաքաղաք Կիեւ։

NEWS.am-ի հետ զրույցում ՀՀ քաղավիացիայի կոմիտեի նախագահի օգնական Լիլիթ Աղաբեկյանն ասաց, որ այս պահի դրությամբ ավիաընկերությունները չվերթները չեղարկելու վերաբերյալ հայտեր չեն ներկայացրել։

«Քանի որ ավիաընկերություններն արտերկրյա են, իրենք պետք է չեղարկեն չվերթները եւ տեղեկացնեն մեզ։ Իրավիճակը փոփոխական է ու մեզնից կախված չէ։ Այսինքն՝ կարող է նոր օդանավակայան կամ օդային տարածք փակվի ու որն էլ կազդի մեզ վրա»,- NEWS.am-ի հետ զրույցում ասաց Քաղավիացիայի կոմիտեի նախագահի օգնական Լիլիթ Աղաբեկյանը։

Նշենք, որ Ռուսաստանի նախագահ Վլադիմիր Պուտինը առավոտյան ժամը 05.50-ին ռուսաստանցիներին ուղղված իր ուղերձում հայտարարել է, որ Դոնբասում հատուկ ռազմական գործողության մասին որոշում է կայացրել: