Կառավարությունը ամբողջությամբ կամ մասնակի կփոխհատուցի 81 սահմանամերձ բնակավայրերի բնակիչների կոմունալ ծախսերը

ՀՀ կառավարությունն իր այսօրվա՝ փետրվարի 23-ի նիստում որոշեց սահմանամերձ համայնքներին 1,155 մլրդ դրամ հատկացնել: ՏԿԵ նախարար Գնել Սանոսյանը նշեց, որ այդ գումարը կհատկացվի 5 մարզերի 23 համայնքների 83 բնակավայրերին. «Դրանք հիմնականում 4 ուղղությամբ են՝ անշարժ գույքի հետ կապված հարկերը, էլեկտրաէներգիայի, գազի, ոռոգման ջրի հետ կապված:

Այս որոշմամբ գործ ունենք մոտ 100 հազար շահառու հետ: Այս որոշմամբ մեղմացնում ենք այս 4 ուղղություններով նրանց վճարումները կամ ամբողջովին պետությունն է իրականացնում»,-ասաց նա:

Վարչապետ Նիկոլ Փաշինյանը հստակեցրեց, որ խոսքը սահմանամերձ եւ նաեւ սահմանամերձ դարձած գյուղերի կոմունալ ծախսերի եւ անշարժ գույքի հարկի գծով որոշակի փոխհատուցում տալու մասին է. «Շահառուների թիվն ընդլայնվել է եւ մենք սահմանամերձ գյուղերում ապրող մեր հայրենակիցներին աջակցում ենք»,-ասաց նա: Նշենք, որ վերոնշյալ գումարը տրամադրվում է ՀՀ Արարատի (թվով2), Գեղարքունիքի (թվով3), Վայոց Ձորի (թվով2), Սյունիքի (թվով5), և Տավուշի (թվով11) մարզերի 23 սահմանամերձ համայնքների 81 բնակավայրերի բնակիչներին: