Կրեմլի նախկին գորշ կարդինալի կարծիքով, Ռուսաստանին անհրաժեշտ է ոչ թե նվաստացուցիչ, այլ արժանապատիվ և ճիշտ խաղաղություն

Այսօր, Կրեմլի նախկին գորշ կարդինալի համբավ ունեցող Վլադիսլավ Սուրկովը հոդվածով է հանդես եկել, որտեղ նշել է, թե Ռուսաստանի ներկայիս սահմանները «անարդար ձևով են կազմված»: Նա այսօրվա Ռուսաստանի սահմանները համեմատել է 1918-ին Բրեստ-Լիտովսկ քաղաքում կնքված պայմանագրից հետո իրավիճակի հետ, նշելով, որ բոլշևիկները 1918-ին այդ պայմանագրով Ռուսաստանի արևմտյան տարածքները հանձնեցին թշնամիներին: Ըստ նրա, ճիշտ է, Իոսիֆ Ստալինը հետագայում վերականգնեց արդարությունը, սակայն ԽՍՀՄ առաջին և վերջին նախագահ Միխաիլ Գորբաչովն առանց պատերազմի կրկին Ռուսաստանի սահմանները փոքրացրեց, և այսօրվա  Ռուսաստանի արևմտյան սահմանները, զարմանալի զուգադիպությամբ, համընկնում են 1918-ին կնքած պայմանագրով սահմանների հետ:

Այն ժամանակ, ըստ Սուրկովի, Ռուսաստանում բոլշևիկների խաղաղ պայմանագիրը կոչեցին՝ խայտառակ ու նվաստացուցիչ /похабный/: Շարունակելով իր այդ միտքը, Սուրկովը նշում է, որ Ռուսաստանին անհրաժեշտ է ոչ թե խայտառակ և նվաստացուցիչ, այլ արժանապատիվ և «ճիշտ» խաղաղություն, քանզի միայն այդ դեպքում հնարավոր կլինի ապահովել Ռուսաստանի անվտանգությունը:

Արտակ Հակոբյան