Հայկ Ալումյան. Վիրավորանքների կեղտոտ մեխանիզմները ներդրել են «հեղափոխականները». Տեսանյութ

Վիրավորանքների կեղտոտ մեխանիզմները ներդրել են «հեղափոխականները»՝ դրանք լայնորեն կիրառելով «հեղափոխության» օրերին։ Այս մասին «Հայելի» ակումբում ասաց փաստաբան Հայկ Ալումյանը։

Վիրավորանքների դեմ իշխանության նախաձեռնած պայքարի համատեքստում նա հիշեց ԽՍՀՄ տարիների մի անեկդոտ․ «Բրեժնեւին վիրավորելու համար մի քաղաքացու են դատում, ում 8 տարվա ազատազրկման են դատապարտում։ Ինչպե՞ս, 8 տարի՞, վիրավորանքի համա՞ր։ Ոչ թե վիրավորանքի, այլ պետական գաղտնիք հրապարակելու համար»։

Ալումյանը շարունակեց, որ սոցցանցերում վիրավորանքներ էր հնչեցնում ներկայիս իշխանությունը «հեղափոխության» օրերին։ «Շատերը, հատկապես մտավորականությունը, չէին հայտնում իրենց կարծիքը, եթե այն չէր համընկնում «հեղափոխականների» կարծիքի հետ, քանի որ ի պատասխան հնչում էին վիրավորանքներ։ Այդ ժամանակ շատ քիչ էր հակառակ տեսակետ հնչում, քանի որ «հեղափոխականները» վիրավորանքների կեղտոտ տեխնոլոգիաներ էին կիրառում։ Հնարավոր չէր այլընտրանքային կարծիք գտնել։ Սակայն այդ ժամանակ վիրավորանքների դեմ որեւէ օրենք չընդունվեց։ Իսկ երբ վիրավորանքի թիրախ դարձան ներկայիս իշխանությունները, օրենքներ ընդունեցին, որոնք, իբր, փորձում են պաշտպանել բոլորին, սակայն իրականում՝ պաշտպանում են իշխանություններին։ Ընդ որում, վարչապետին վիրավորելու համար քրեական պատասխանատվության մասին օրենքն ընդհանրապես անօրինական է»,- նշեց Ալումյանը։

Մանրամասները՝ NEWS.am-ում: