Էրդողանը Կիևում պահակախմբին դիմել է «Слава Украине» բառերով և հանդիպել Ղրիմի թաթարների պատվիրակության հետ. Անկարան շարունակում է սադրել Մոսկվային. Տեսանյութ, լուսանկարներ

Թուրքիայի նախագահ Ռեջեփ Թայիփ Էրդողանը Կիև կատարած պաշտոնական այցի ընթացքում, տեղական իշխանությունների ավանդույթի համաձայն, ողջույններ է փոխանակել զինվորական պահակախմբի հետ։

Հրապարակված կադրերում երևում է, որ Էրդողանը և Ուկրաինայի նախագահ Վլադիմիր Զելենսկին լքում են Կիևի Մարիինյան պալատը, որտեղ նրանց դիմավորում է պատվո պահակախումբը։ Դրանից հետո Թուրքիայի նախագահը դիմում է զինվորականներին՝ «Փառք Ուկրաինային» («Слава Украине») ողջույնով։ Պատվո պահակախումբը ի պատասխան վանկարկել է. «Փա՛ռք հերոսներին»։

Այս ողջույնն օգտագործել են ուկրաինացի ազգայնականները Երկրորդ համաշխարհային պատերազմի ժամանակ, 2014 թվականի հեղաշրջումից հետո այն օգտագործվում է Ուկրաինայում որպես հայրենասիրական ողջույն, 2018 թվականին այն դարձել է պաշտոնական ողջույն երկրի բանակում և ոստիկանությունում։

Ուկրաինա կատարած այցի ընթացքում Էրդողանն ընդունել է նաեւ Ղրիմի թաթարների պատվիրակությանը Ղրիմի թաթար ժողովրդի առաջնորդ Մուստաֆա Աբդուլջեմիլ Քըրըմօղլուի գլխավորությամբ։

Հանդիպումը տեղի է ունեցել Կիևի Բորիսպիլ միջազգային օդանավակայանում, նշում է Anadolu-ն։

Զրույցը կայացել է Թուրքիայի արտգործնախարար Մևլութ Չավուշօղլուի, բնապահպանության, քաղաքաշինության և կլիմայի փոփոխության նախարար Մուրադ Քուրումի, Թուրքիայի նախագահի աշխատակազմի կապի ղեկավար Ֆահրեթթին Ալթունի և Թուրքիայի նախագահի մամուլի քարտուղար Իբրահիմ Քալինի ներկայությամբ։

Zham.am