Ադրբեջանցիները մեքենա են բերել, ոչխարները տարել

«Հրապարակ»-ը գրում է. «Օրեր առաջ գրել էինք, որ ադրբեջանական կողմը հրաժարվում է վերադարձնել Սյունիքի մարզի Տեղ համայնքի բնակիչ Սուրիկ Մաթեւոսյանի ոչխարի հոտը: Այսօր արդեն Տեղի համայնքապետ Դավիթ Ղուլունցը hraparak.am-ին ասաց, որ բանակցություններն այդպես էլ արդյունք չտվեցին, եւ ոչխարները վերադարձնելու հույս գրեթե չկա:

«Նույնիսկ տեղեկություններ են հասել, որ ադրբեջանցիները մեքենա են բերել, ոչխարները տարածքից ընդհանրապես տարել են, հետքը կորցրել, դե, երևի տարել են՝ մեջ-մեջ անելու»,-ասաց համայնքապետը՝ նշելով, որ այլ տարբերակ չի մնում, քան մարզպետարան գրություն ներկայացնել՝ 53-ամյա հովվին օգնելու նպատակով:

Թեպետ, մարզպետարանը դժվար թե կարողանա փոխհատուցել այնքան, որքան վնասի իրական չափն է, բայց ինչպես համայնքապետն ասաց․« Ինչքան էլ, որ օգնեն, էլի բան է: Ասել եմ՝ մինչև շաբաթվա վերջ սպասենք, հետո գրություն պատրաստենք» :

Հիշեցնենք, որ հունվարի 13-ին Սյունիքի Տեղ համայնքի բնակիչ, հովիվ Սուրիկ Մաթեւոսյանին ադրբեջանցիները գերի տարան եւ նույն օրը՝ ուշ երեկոյան, ռուս խաղաղապահների միջնորդությամբ վերադարձրին։ Ադրբեջանցիները նրա հետ տարել էին նաեւ մոտ 350 գլուխ ոչխար եւ այդպես էլ չվերադարձրին՝ պատճառաբանելով, թե հովվի հետ ոչխարներ չեն եղել»։