ԱՄՆ-ում Չինաստանի դեսպանը հայտարարել է Վաշինգտոնի հետ ռազմական հակամարտության հավանականության մասին, իսկ ՀԴԲ-ի ղեկավարը Չինաստանն անվանել է ԱՄՆ տնտեսության համար ամենամեծ սպառնալիքը

ԱՄՆ-ի և Ռուսաստանի հարաբերությունների վատթարացման ֆոնին լուրջ սրացում է նկատվում նաև Վաշինգտոնի և Պեկինի հարաբերություններում։ 

«ԱՄՆ-Չինաստան հարաբերությունների առանցքային խնդիրը Թայվանի անկախության հարցն է»։ Այս մասին National Public Radio-ին տված հարցազրույցում ասել է ԱՄՆ-ում Չինաստանի դեսպան Ցին Գանգը։

«Եթե ​​Թայվանի իշխանությունները շարունակեն «քայլել անկախության ճանապարհով»՝ Վաշինգտոնի աջակցությամբ, ապա ԱՄՆ-ի և Չինաստանի միջև ռազմական հակամարտությունը հավանական է»,-ասել է դիվանագետը։ Գանգն ասել է, որ Չինաստանի և Թայվանի ժողովուրդները չինացի հայրենակիցներ են, և Պեկինը ջանքեր է գործադրում խաղաղ վերամիավորման համար։ «Սակայն Չինաստանը չի հրաժարվի վերամիավորման ոչ խաղաղ միջոցներից, քանի որ դրանք զսպող գործոն են», - զգուշացրել է դեսպանը:

ԱՄՆ-ից բազում պաշտոնյաներ արձագանքեցին Չինաստանի դեսպանի այս հայտարարությանը: Միևնույն ժամանակ, Չինաստանի դեսպանի կոշտ խոսքերից հետո ամերիկացի պաշտոնյաների որոշ հայտարարություններ վերաբերում էին ոչ միայն Թայվանի թեմային, այլև առնչվում էին Միացյալ Նահանգների և Չինաստանի տնտեսական և տեխնոլոգիական առճակատմանը, որը մի շարք փորձագետները կապում են պաշտոնական Պեկինի և չինական ընկերությունների դեմ ամերիկյան պատժամիջոցների սպասվող նոր ալիքի հետ։ Նրանց թվում է ՀԴԲ-ի (ФБР-Zham.am) ղեկավար Քրիստոֆեր Ռեյը, ով Չինաստանն անվանել է ԱՄՆ տնտեսության և նորարարության համար ամենամեծ սպառնալիքը:

«Ամփոփելով այն, ինչ ակնհայտ է մեր հետաքննություններից, որոնցից ավելի քան երկու հազարը նվիրված են Չինաստանի կառավարության՝ մեր տեղեկատվությունը կամ տեխնոլոգիաները գողանալու փորձերին, պարզվում է, որ ոչ մի երկիր ավելի ակնհայտ վտանգ չի ներկայացնում մեր գաղափարների, նորարարությունների համար, քան Չինաստանը: Չինաստանի կառավարությունը գողանում է ապշեցուցիչ քանակությամբ տեղեկատվություն և լուրջ վնաս է պատճառում արդյունաբերության լայն շրջանակին», - ասաց Ռեյը:

Zham.am