Նույնիսկ Հայաստանի հիվանդանոցներում անկանխիկ վճարումները չեն ընդունվում, ո՞նց եք ողջ տնտեսությունը անկանխիկ դարձնելու

Արդեն երկու ամիս է ինչ ԱԺ-ի կողմից առաջին ընթերցմամբ ընդունվել է «Անկանխիկ գործառնությունների մասին» ՀՀ օրենքի նախագիծը, որով սահմանափակվում, իսկ որոշ դեպքերում բացառվում է Հայաստանի տարածքում գործարքների դիմաց կանխիկ ձևով վճարումը:

Օրինակ, անհատ ձեռներեցների և կազմակերպությունների կողմից 300 000 դրամը գերազանցող գործարքները պետք է իրականացվեն անկանխիկ ձևով:

Բացառապես անկանխիկ գործարքների պետք է անցնեն փաստաբանական ծառայություններն ու նոտարական գրասենյակները:

Պատկերացրեք, թե ինչ աստիճանի է բարդանալու հասարակ քաղաքացու վիճակը, երբ նա գործ է ունենալու նոտարական գրասենյակի հետ:

Ինչ վերաբերվում է փաստաբանական գրասենյակներին, ապա այս որոշումից ընդծված քաղաքական հոտ է գալիս:

Փաստաբաններն այսօր Փաշինյանի աչքի փուշն են դարձել և զարմանալի չէ, որ փաստաբանական ծառայությունները պիտի տարանջատվեին մյուս կազմակերպություններից:

Պետական կամ բյուջեներից կատարվող ցանկացած վճարում պետք է իրականացվի անկանխիկ ձևով:

Այս խնդիրն էլ ձևական բնույթ ունի: Քաղաքացին իր աշխատավարձը ստանալով միանգամից կանխիկացնում է, քանզի զուտ տեխնիկական տեսանկյունից, անխանխիկ գործիքները երկրի տնտեսության մեջ լավ չեն զարգացած: Բացի այդ, անկանխիկ ձևով իր միջոցները պահելը այդքան էլ ռացիոնալ չէ մի մարդու համար ում աշխատավարձն ասենք 100 000-120 000 դրամ է կազմում: Զարգացած երկրներում, անկանխիկ հարաբերությունները պայմանավորվում են նաև բարձր կենսամակարդակ և զարգացած հասարակություն  ունենալով: Սակայն նույնիսկ այս պարագայում, օրինակ զարգացած Գերմանիայում, բնակչության մոտ 50 տոկոսն իրենց առօրյա առևտուրն իրականացնում է կանխիկի միջոցով:

Թեև, նույն Գերմանիայում անկանխիկի գրեթե բոլոր գործիքները տնտեսության մեջ առկա են:

Հայաստանում ոչ միայն փոքր խանութները չունեն այդ գործիքները, այլև նույնիսկ խոշոր և հայտնի հիվանդանոցները չեն աշխատում կանխիկով, ինչը անկեղծ  ասած խայտառակություն է:

Փաշինյանի իշխանությունը փորձելով լուծել մոդայիկ խնդիրները, որոնք առաջին հայացքից առաջադիմական բնույթ ունեն, գործնականում, հասարակ և «հպարտ» քաղաքացիներին, գոնե սկզբնական փուլում, ծանր վիճակի մեջ են գցելու, քանզի այս իշխանության համար մարդը էքսպերիմենտի առարկա է, և ոչ ավել:

Սա է իրականությունը:

Դավիթ Մկրտչյան