Պայթյուն՝ Toyota Prado-ում. գազով լիցքավորելուց հետո վարորդը ծխախոտ է վառել. նա տարբեր աստիճանի այրվածքներ է ստացել

Երեւանում, այսօր՝ հունվարի 14-ին, արտակարգ դեպք է տեղի ունեցել. ժամը 00:50 –ի սահմաններում ՀՀ ոստիկանության օպերատիվ կառավարման կենտրոն ահազանգ է ստացվել, որ  Տիչինայի փողոցում պայթյունի ձայն է լսվել:

Shamshyan.com-ի հաղորդմամբ, պարզվել է, որ, ըստ նախնական տեղեկությունների՝ գազի բռնկման հետևանքով պայթյուն է առաջացել Երևանի բնակիչ, 26-ամյա Արթուր Ա.-ի կողմից վարած Toyota  Prado մանիշի ավտոմեքենայում:

Մինչ հետաքննիչը տեղում աշխատում էր, Այրվածքաբանության կենտրոնից ժամը 02:00-ի սահմաններում ահազանգ է ստացվել ոստիկանության Մալաթիայի բաժին, որ «գլխի, պարանոցի, ձեռքերի 1,2,3-րդ աստիճանի այրվածքներ» ախտորոշմամբ իրենց մոտ է  տեղափոխվել մի քաղաքացի:

Մալաթիայի ոստիկանները պարզել են, որ վիրավորը Արթուր Ա.-ն է: Ըստ նախնական տեղեկությունների՝ վերջինս ավտոմեքենան գազալցակայանում լիցքավորել է, ապա դուրս գալով այնտեղից, ավտոմեքենայի սրահում ծխախոտ է վառել, ինչից էլ առաջացել է պայթյուն:

Փաստի առթիվ ոստիկանության Մալաթիայի բաժնի հետաքննական բաժանմունքում նյութեր են նախապատրաստվում: