Սյունիքի մարզկենտրոնը Կապանից կտեղափոխվի Սիսիա՞ն

Սյունիքում ակտիվ խոսակցություններ են շրջանառվում, որ իշխանությունները Սյունիքի մարզկենտրոն են ցանկանում դարձնել Սիսիան քաղաքը և մարզպետարանը տեղափոխում են Սիսիան։ 

Բանն այն է, որ պատերազմից հետո Հայաստանի հարավ-արևելքը՝ Սյունիքը անվտանգային լուրջ մարտահրավերների առջև է կանգնած 2021 թվականին՝ Փաշինյանի հայտարարած խաղաղ դարաշրջանում թշնամուն զիջվեց Գորիս-Կապան, Կապան-Ճակատեն ավտոճանապարհները։

Մարզկենտրոն Կապան հասնելը նախքան պատերազմն էլ դժվար էր, այժմ դժվարությունները քառակի ավելացել են, այլընտրանքային կոչվող ճանապարհով էլ հեշտ չէ հասնել Կապան՝ ոլորանները շատ են, Գորիս- Կապան հիմնական ճանապարհն էլ զիջելուց հետո, ճանապարհն էլ ավելի է երկարել։

Ավելի հատկանշական է, որ թշնամին վերջին շրջանում չի թաքցնում ախորժակը․ Իր բաղձալի «Զանգեզուրի միջանցք»-ի համար Ալիևն արդեն ժամկետներ է պահանջել և կարելի է ենթադրել, որ մարզկենտրոնի փոփոխությունը կարող է անմիջական կապ ունենալ թշնամու երազանքի իրագործման հետ։

Yerevan.Today-ի հետ զրույցում, սակայն, Սյունիքի մարզպետ Մելիքսեթ Պողոսյանը ժխտում է այս տեղեկությունները․ «Նման բան չկա»,- մեզ հետ զրույցում ասաց մարզպետը և այլ մեկնաբանություն չտվեց։