Փարիզում դեկտեմբերի 31-ից փողոցներում դիմակային ռեժիմ է մտցվում

Դեկտեմբերի 31-ից դիմակներ կրելը Փարիզի փողոցներում պարտադիր կդառնա՝ COVID-19-ի աճող դեպքերի պատճառով։ Այս մասին հայտնել է մայրաքաղաքի ոստիկանության պրեֆեկտուրան։

«Փարիզի նման քաղաքում դիմակներ կրելը փակ տարածքներում կամ դրսում չափազանց կարեւոր միջոց է, որը կօգնի զգալիորեն դանդաղեցնել վիրուսի շրջանառությունը»,- պարզաբանել են պրեֆեկտուրայում: Այս միջոցը, ինչպես նշված է ոստիկանությունում, վերաբերում է քաղաքի բոլոր բնակիչներին եւ 11 տարեկանից բարձր հյուրերին։ Բացառություն է արվել հեծանվորդների, ավտովարորդների եւ փողոցում սպորտով զբաղվող մարդկանց համար, փոխանցում է ՏԱՍՍ-ը։

Ֆրանսիայի առողջապահության նախարարության ղեկավար Օլիվյե Վերանի հրապարակած տվյալների համաձայն՝ վերջին մեկ օրվա ընթացքում իշխանությունները երկրում գրանցել են կորոնավիրուսով վարակման ավելի քան 200 հազար դեպք։ Փարիզում յուրաքանչյուր 100 հազար բնակչին բաժին է ընկնում միջինում վարակման մոտ 2 հազար դեպք։