«Կարգին Հայկո»-ի շնորհավորանքից երևաց, որ նա հայտ է ներկայացնելու դառնալ Փաշինյանի այլընտրանքը. Տեսանյութ

Այս օրերին բոլոր ներկա և նախկին գործիչները Ամանորյա ու Սուրբ Ծննդյան շնորհավորանքներով են հանդես գալու՝ ուղղված ժողովրդին, որից էլ պարզ երևալու է, թե ով ինչ հեռահար նպատակներ է հետապնդելու:

Այդ շարքում Երևանի նախկին քաղաքապետ Հայկ Մարությանն արդեն հանդես եկավ տեսահոլովակով, որտեղ նա ամփոփեց իր կառավարման երեք տարիները, ցույց տալով, թե ինչպես է կատարել իր խոստումները:

Հոլովակից պարզ երևում է, որ Մարությանը միայն իր հանդեպ  բարի հիշողության պահպանման պատճառով  չէր պատրաստել այդ տեսահոլովակը: Նա հետևողականորեն տանում էր այն գիծը, որ ինքը՝ Մարությանը, «խոսքի տեր գործիչ է» և «ինչ խոստացել է, այն էլ կատարել է»: Ընդ որում, Մարությանը հանդես էր գալիս, որպես 2018-ի հեղափոխության արժեքները պաշտպանող գործիչ: Նրա տեսահոլովակի կարմիր թելն այն էր, որ Երևանում վերջին  երեք տարվա ընթացքում փոփոխությունները արմատական բնույթ են կրել, կարծես ակնարկելով, ի տարբերություն երկրի, որտեղ փոփոխությունները միմիայն վատացրել են մարդկանց կյանքը, իսկ խոստումների մեծ մասը չեն կատարվել: Տեսահոլովակում Փաշինյանի և նրա թիմի մասին ոչինչ չկար, սակայն այդ մոտեցումը չթուլացրեց այն միտումը, որտեղ կարծես առաջարկվում էր ընթերցողին՝ համեմատել Մարությանին և Փաշինյանին իրար հետ:

Բացի այդ, Մարությանի տեսահոլովակից կարծես երևում էր իր պոզիտիվ տեսլականը, այսինքն, կարծես, ակնարկվում էր՝ «ես կարող եմ դեպի լավը փոխել մարդկանց կյանը»:

Վերջում նա շնորհակալություն հայտնեց «իրեն վստահած քաղաքացիներին», նշելով,  որ «բոլորս պետք է հոգ տանենք մեր քաղաքաի և պետության մասին, անկախ  դիրքից և պաշտոնից»: Մարդկային լեզվի թարգմանելով՝ դա նշանակում է, որ Մարությանը իր վարկանիշը փորձելու է կապիտալիզացնել հետագայում հանրային քաղաքական կյանքում, հանդես գալով որպես այլընտրանք ներկա իշխանությանը:

Իսկ թե ինչքանով նա կկարողանա կյանքի կոչել իր ծրագրերը, ցույց կտա ժամանակը:

Սա՛ է իրականությունը:

Արտակ Հակոբյան