Երևանում բնակարանների միջին գինը մեկ տարվա ընթացքում նվազել է միանգամից 6,5 տոկոսով
«Հայկական ժամանակ»-ը գրում է. «Այս տարվա մայիսին Հայաստանում արձանագրվել է անշարժ գույքի գների կտրուկ անկում: Համենայն դեպս, այսպիսի պաշտոնական տվյալներ է հրապարակել ՀՀ ազգային վիճակագրական ծառայությանը՝ հղում անելով ՀՀ ԿԱ անշարժ գույքի կադաստրի պետական կոմիտեին:
Մասնավորապես՝ Երևանում անշարժ գույքի միջինացված գինը նվազագույնն է անցած 5 տարիներին: Քանի որ անշարժ գույքի գները որոշակի սեզոնային բնույթ ունեն, բերված են անցած հինգ տարիների ընթացքում հենց մայիս ամիսներին գրանցված գները:
Բնակարանները Երևանում թանկացել են 5 տարի անընդմեջ և միայն այս տարվա մայիսին, մեղմ ասած, նվազել են, իսկ ավելի ճիշտ՝ գահավիժել են: Իսկ Կենտրոնում պատկերը այլ է: 2012 թ. մայրաքաղաքի կենտրոնում բնակարանները կտրուկ թանկացել են, այնուհետև մնացել են նույն մակարդակի, իսկ այս տարվա մայիսին կրկին կտրուկ աճել են:
Թե ինչով է պայմանավորված անշարժ գույքի գների այսպիսի պահվածքը, դժվար է ասել: Նախ, պետք է հաշվի առնել, որ խոսքը գների պաշտոնական վիճակագրության մասին է, որն այնքան էլ չի արտահայտում իրական պատկերը:
Անցած մի քանի տարիներին բնակարանները էժանանում էին, սակայն պաշտոնական տվյալներով այդ էժանանալու տեմպը բարձր չէր: Չի բացառվում, որ Անշարժ գույքի կադաստրը պարզապես որոշել է «ռեստարտ» անել իր վիճակագրությունը և իրականությանն ավելի մոտ պատկեր ցույց տալ:
Ամեն դեպքում միայն մեկ տարվա ընթացքում երևանյան բնակարանների միջին գինը, ըստ այս վիճակագրության, նվազել է միանգամից 6,5 տոկոսով: Այս հաշվարկի մեջ չեն մտնում Կենտրոնի բնակարանները, որոնք թանկացել են ավելի քան 5 տոկոսով»,-գրում է թերթը:
Մանրամասները՝ թերթի այսօրվա համարում:
Հետևեք մեզ Facebook-ում