Իրավապահ մարմիններն ու կառավարությունը 20 օր է, չեն կարողանում պարզել՝ Ռազմիկ Պետրոսյանի դիպլոմը կե՞ղծ է, թե ոչ

Շուրջ 20 օր առաջ Yerevan.Today-ը գրել էր, որ Արագածոտնի մարզպետ Ռազմիկ Պետրոսյանը, պարզվում է, նշանակվել է այդ պաշտոնին ՀՀ օրենսդրության կոպիտ ոտնահարմամբ։

Մենք ուսումնասիրել էինք, թե ի՞նչ կրթություն ունի Ռազմիկ Պետրոսյանը, որը 2021թ․ հոկտեմբերի 28-ին Արագածոտնի մարզպետ է նշանակվել։ Ռազմիկ Պետրոսյանի կենսագրականի մեջ գրված է․ «Մասնագիտությամբ տնտեսագետ է, ունի բարձրագույն զինվորական կրթություն»։ Պարզելու համար, թե կոնկրետ որտեղ է ստացել տնտեսագետի որակավորում, դիմել էինք մարզպետարան, ստացել էինք պատասխանը:

2002 թվականի մայիսի 25-ին ավարտել է Հովնանյանի անվան համալսարանը՝ ֆինանսներ և վարկ մասնագիտությամբ՝ տնտեսագետի որակավորմամբ: Այնուհետև դիմել էինք՝ ԿԳՄՍՆ՝ հասկանալու համար, թե ինչ համալսարան է դա:

Պարզվեց, որ Հովնանյանի անվան համալսարանը իրավունք է ունեցել գործելու 1996-2001 թվականներին, 2001 թվականից հետո չի ունեցել լիցենզիա, հետևաբար՝ չի ունեցել նաև հավատարմագրում, բայց 2002 թվականին դիպլոմ է տվել Ռազմիկ Պետրոսյանին։

Քանի որ ըստ օրենքի՝ վարչական պաշտոն զբաղեցնող անձը պարտադիր պետք է ունենա բարձրագույն կրթություն, մենք հրավիրել էինք իրավապահների ուշադրությունը: Դիմել էինք կառավարություն: Կառավարությունից մեզ տեղեկացրել էին, որ դրանով զբաղվում են իրավապահ մարմինները: Նյութի հրապարակման օրը՝ դեկտոմբերի 2-ին դատախազությունը հայտնել էր, որ ուսումնասիրում են:

Հիշեցնենք նաև, որ ՏԿԵ նախարար Գնել Սանոսյանը այս հարցի կապակցությմբ ասել էր, որ կառավարության աշխատակիցները ընդունել են համապատասխան փաստաթղթերը, չեն ստուգել դիպլոմի տրամադրման կարգը, իրենք պարտավոր չեն ստուգել բուհի լիցենզիան:

20 օր անց փորձեցինք հասկանալ, թե ինչ են պարզել իրավապահները: Դատախազությունից մեզ հայտնեցին, որ գործն ուսումնասիրում է 6-րդ վարչությունը, պատասխան իմանալուն պես կհրապարակեն:

Նշենք, որ մեզնից պահանջվեց երկու հարցում և մոտավորապես 5 օր պարզելու համար, որ Արագածոտնի մարզպետի դիպլոմը կեղծ է, իսկ ահա կառավարությունն ու իրավապահ մարմինները 20 օրից ավելի է, չեն կարողանում պարզել՝ ինֆորմացիան ճիշտ է, թե չէ: