Հայկոյի ելույթը գրագետ էր քաղաքական տեսակետից, բայց նա պետք է որոշակի պարզաբանումներ տա նաեւ հասարակությանը

Երևանի դեռևս քաղաքապետ Հայկ Մարությանի այսօրվա ելույթը գրագետ կառուցված էր իր ձևով և բովանդակությամբ: Ելույթում նա փաստացի «ձեռնոց նետեց» իշխող թիմին և անձամբ Նիկոլ Փաշինյանին՝ բացահայտ հայտարարելով, որ «Նիկոլն ու իր թիմը փորձում են սեփականաշնորհել 2018 թվականի հեղափոխության ողջ էությունը»:

Մարությանը կետ առ կետ հիմնավորեց, որ «հեղափոխական արժեքներից» երես է թեքել ոչ թե ինքը, այլ Նիկոլն ու իր մերձավոր մարդկանց նեղ շրջանակը։ Մարությանը նշեց այն ամենը, ինչը որ բոլորն արդեն գիտեն, բայց երբ այս ամենը հնչում է իշխող ուժի ներկայացուցչի շուրթերից, հասարակության այն շերտի համար, որը հավատարիմ է «հեղափոխության արժեքներին», սկսում է կասկածել, որ ըստ էության Նիկոլը փորձում է կայացնել երկրում հին, եթե ոչ հնագույն բարքերը։

Փաշինյանի թիմի ագահությունը սահմաններ չունի, և այս ֆոնին նրանց գնահատականները նախորդ իշխանության գործունեության մասին ուղղակի ցինիզմ են։ Սա վերաբերում է բոլոր խնդիրներին՝ փոքր կենցաղային խնդիրներից մինչև մեծ հարցեր: Վաղվա իշխանափոխությունը, անշուշտ, կբացահայտի Նիկոլի իշխանության ողջ գիշատիչ էությունը, որը սկզբում մարդկանց «սոցիալական արդարություն» էր խոստանում, իսկ իշխանության գալուց հետո «թուլափայ» շպրտեցին իրենց հավատացած մարդկանց՝ սեփականաշնորհելով կառավարման համակարգի բոլոր «յուղոտ կտորները»։

Ինչպես գիտեք, ցանկացած իշխանություն ժամանակի ընթացքում սկսում է «լճանալ», և 20-ամյա իշխանությունը, անշուշտ, չէր կարող խուսափել այս երեւույթից, բայց ուղղակի զարմանալ ու ափշել կարելի է, թե ինչպես իշխանության եկած «փողոցային գործիչները» ընդամենը 3,5 տարվա մեջ լճացել ու մնացել անվերջ ագահ, ամենավատ բարքերը հաստատելով երկրում։

Անվիճելի փաստ է, որ Նիկոլը և նրա թիմը որևէ առնչություն չունեն արդարության, ժողովրդավարության և հեղափոխական իրական արժեքների հետ։ Լավ է, որ վերջապես այս մասին խոսեց Փաշինյանի թիմի անդամներից Հայկ Մարությանը։ Բայց հանուն արդարության պետք է ասել, որ Հայկոն ինքը մեղքի իր բաժինն ունի մեր հասարակության առաջ, քանի որ առաջին անգամ նրա շուրթերից հնչեց հանրությունը «սևերի ու սպիտակների» բաժանելու մասին հայտնի թեզը:

Եթե ​​նա ընդունի, որ սխալվել է այս հարցում և բացահայտի այն հանգամանքը, որ այս թեզն իրեն առաջարկել է անձամբ Նիկոլ Փաշինյանը, ապա դրանից հետո նրա բոլոր ներկայիս փաստարկներն ու թեզերն ավելի անկեղծ կընկալվեն ողջ հասարակության կողմից։

Իսկ քաղաքական դաշտում նա հնարավորություն կունենա հանդես գալ որպես ինքնուրույն քաղաքական սուբյեկտ, որից կարող են օգուտ քաղել և՛ ինքը, և՛ հասարակությունը։

Սա՛ է իրականությունը:

Դավիթ Մկրտչյա