Այսօր մեկնարկեց «Սասնա ծռեր»-ի գործով18 անդամի մասով առաջին դատական նիստը

Ավան և Նոր-Նորք վարչական շրջանների ընդհանուր իրավասության դատարանում այսօր մեկնարկել է «Սասնա ծռեր»-ի գործով 18 մեղադրյալի մասով առաջին դատական նիստը։ Սա առանձին վարույթով քննվող գործ է, այն կքննվի արտագնա։ Հաղորդում է «Ազատություն»-ը:

Նշենք, որ մյուս՝ 14 անդամի գործը ևս քննվում է արտագնա՝ նույն դատարանում: Երկու գործերն էլ քննում է Էրեբունի և Նուբարաշեն վարչական շրջանների ընդհանուր իրավասության դատարանի դատավոր Արտուշ Գաբրիելյանը:

Այս գործերն անցկացվում են արտագնա, քանի որ, ըստ Դատական դեպարտամենտի տարածած հաղորդագրության՝ պատճառը՝ քննվող քրեական գործով ամբաստանյալների և տուժողների մեծաքանակությունն է:

«Սասնա ծռեր» խմբի 18 անդամի մեջ են Պավել Մանուկյանի որդին՝ Արամ Մանուկյանը, Հովհաննես Հարությունյանը, Թաթուլ Թամրազյանը, Արամ Հակոբյանը, Արթուր Մելքոնյանը, Գևորգ Իրիցյանը, Տիգրան Սարգսյանը, Տիգրան Մանուկյանը, Արայիկ Հակոբյանը, Արթուր Սողոմոնյանը, Գառնիկ Հովակիմյանը, Հովհաննես Վարդանյանը, Վարդան Գերավետյանը, Մարտիրոս Հակոբյանը (Դեդ), Սերգեյ Կյուրեղյանը, Թորոս Թորոսյանը, Մանվել Աթոյանը և Վարդգես Գևորգյանը:

Հիշեցնենք, «Սասնա ծռեր» կոչվող զինված խումբը անցած տարվա հուլիսի 17-ին գրավել և երկու շաբաթ վերահսկողության տակ էր պահել Ոստիկանության պարեկապահակետային գնդի տարածքը: Այդ ընթացքում զոհվել էր երեք ոստիկան: Հուլիսի 31-ին խմբի անդամները հանձնվեցին իրավապահներին:

Նշենք, որ ՊՊԾ գնդի տարածքի գրավման ընթացքում երեք ոստիկան զոհվեց։ Նախաքննական մարմինը սպանությանները մեղսագրում է Արմեն Բիլյանին և Սմբատ Բարսեղյանին։

Ոստիկանության ՊՊԾ գնդի տարածքը գրաված զինված խմբի գործի շրջանակներում ավելի քան 60 մարդ է մեղադրվում, որոնց հիմնական մասին մեղսագրվում է կազմակերպված խմբի կողմից ապօրինի կերպով զենք զինամթերք կրելը, փոխադրելը, շենք շինություններ գրավելը, պատանդ վերցնելը, գույք ոչնչացնելը։

Աղբյուր՝ «Ազատություն»