Պուտինն ու Մակրոնը քննարկել են Լեռնային Ղարաբաղի հարցը

Ռուսաստանի նախագահ Վլադիմիր Պուտինն ու Ֆրանսիայի նախագահ Էմանուել Մակրոնը ֆրանսիական կողմի նախաձեռնությամբ կայացած հեռախոսազրույցի ընթացքում հանգամանալից քննարկել են Լեռնային Ղարաբաղի հակամարտության կարգավորման հարցը։

Պուտինը տեղեկացրել է Ռուսաստանի, Ադրբեջանի և Հայաստանի ղեկավարների՝ 2021 թվականի նոյեմբերի 26-ին Սոչիում կայացած եռակողմ հանդիպման հիմնական արդյունքների մասին: Նա ասել է, թե ինչպես է տարածաշրջանում իրականացվում հրադադարի ռեժիմի պահպանման, փախստականների վերադարձի, առևտրատնտեսական և տրանսպորտային կապերի վերականգնման միջոցառումների իրականացումը:

Զրուցակիցները հույս են հայտնել, որ Նիկոլ Փաշինյանի և Իլհամ Ալիևի` դեկտեմբերի 15-ին Եվրամիության կառույցների ղեկավարների հետ հանդիպումը նույնպես օգտակար կլինի, նրանք խոսել են նաև ԵԱՀԿ Մինսկի խմբի համանախագահների (Ռուսաստան, ԱՄՆ, Ֆրանսիա) աշխատանքի ակտիվացման նպատակահարմարության մասին։