Գրեթե երեք տարվա իմ դիվանագիտական առաքելությունն Իսպանիայում մոտեցավ իր ավարտին. Դեսպանի ուղերձը

Սիրելի՛ հայրենակիցներ, 

Գրեթե երեք տարվա իմ դիվանագիտական առաքելությունն Իսպանիայում մոտեցավ իր ավարտին։

Վերջին օրերին հրաժեշտ տվեցի Իսպանիայի արտաքին գործերի նախարարության, այլ գերատեսչությունների, խորհրդարանի իմ գործընկերներին:

Հակիրճ ամփոփելով անցած տարիների հայ-իսպանական հարաբերությունները` կցանկանայի ընդգծել դրանց բավականին դինամիկ զարգացումը թե' երկկողմ միջկառավարական, թե միջխորհրդարանական դիվանագիտության մակարդակներում:

Այս 3 տարիների ընթացքում կարևոր քաղաքական իրադարձություններից կցանկանայի առանձնացնել Հայաստանի և Իսպանիայի արտաքին քաղաքական գերատեսչությունների միջև կայացած քաղաքական խորհրդակցությունները, իսպանացի խորհրդարանականների այցը Հայաստան և Արցախ, Իսպանիայի Պատգամավորների Կոնգրեսում ընդունված հայամետ բանաձևերը, տարբեր քաղաքների կողմից Հայոց ցեղասպանության և Արցախի անկախության ճանաչումը և այլն։

Ընդամենը մի քանի օր առաջ՝ նոյեմբերի 26-30-ին, կայացավ ՀՀ Ազգային Ժողովի նախագահ Ալեն Սիմոնյանի գլխավորած պատվիրակության այցը Մադրիդ, որտեղ մեր օրենսդիրները մասնակցեցին Միջխորհրդարանական Միության 143-րդ վեհաժողովի աշխատանքներին։

Գրեթե նույն օրերին՝ նոյեմբերի 30-ից դեկտեմբերի 3-ը, Հայաստանի պատվիրակությունը Մադրիդում մասնակցեց ՄԱԿ-ի Զբոսաշրջության համաշխարհային կազմակերպության Գլխավոր ասամբլեայի 24-րդ նստաշրջանին։ 

Քաղաքական, միջխորհրդարանական կապերի ամրապնդումը, տնտեսական հարաբերությունների ընդլայնումը, Իսպանիայի տարբեր ինքնավար համայնքների և քաղաքների ու հայաստանյան մարզերի և քաղաքների միջև ապակենտրոնացված համագործակցության հաստատումը իմ պաշտոնավարության ընթացքում ՀՀ դեսպանության գործունեության առաջնահերթություններից են եղել:

Դեսպանության ուշադրության կենտրոնում մշտապես եղել է նաև մշակութային կապերի ակտիվացումը: Նման միջոցառումներից հիշատակման են արժանի Կոմիտասի ծննդյան 150-ամյակին նվիրված հոբելյանական համերգները։ Ցավոք, մի շարք մշակութային նախաձեռնություններն էլ չեղարկվել են համավարակի հետևանքով ի հայտ եկած սահմանափակումների պատճառով, սակայն հուսով եմ, որ հետագայում դրանք կյանքի կկոչվեն։

Կրթության ոլորտում էական ձեռքբերումներից է Հայաստանի և Իսպանիայի համալսարանների միջև ERASMUS+ ծրագրի շրջանակներում համագործակցության ամրապնդումը։ 

Իհարկե, COVID-19 համավարակը մեծապես խանգարեց ՀՀ դեսպանության և համայնքային կառույցների համատեղ գործունեությանը, սակայն մենք ապացուցեցինք, որ անգամ նման ծայրահեղ իրավիճակներում կարող ենք հասնել մեր առջև դրված խնդիրների լուծմանը։ Դրա վառ օրինակներն են Հայոց ցեղասպանության 105-րդ տարելիցին նվիրված մեր համատեղ միջոցառումները և, իհարկե, Արցախի դեմ սանձազերծված 44- օրյա պատերազմի ընթացքում մեր քույրերին ու եղբայրներին Իսպանիայի տարբեր քաղաքներից հումանիտար օգնության կազմակերպումը։

Սիրելի՛ բարեկամներ,

Ցանկանում եմ երախտագիտությունս հայտնել Իսպանիայի բոլոր համայնքային կառույցներին, բոլոր նրանց, ովքեր իրենց աջակցությունն են բերել ՀՀ դեսպանության աշխատանքներին։ Այդ հաջողությունները ծառայել են ընդհանուր նպատակի՝ հայ-իսպանական հարաբերությունների առավել խորացմանն ու Հայաստան-Սփյուռք համագործակցության հետագա ամրապնդմանը։

Նորանշանակ դեսպան Սոս Ավետիսյանին մաղթում եմ ամենայն բարիք և հաջողություններ իր առաքելության ընթացքում։ Ակնկալում եմ, որ իր դիվանագիտական ծառայության ընթացքում դեսպան Ավետիսյանը կկարողանա ապավինել ձեր լիակատար աջակցությանը։

Մնաք բարով և մինչ նոր հանդիպումներ,

Վլադիմիր Կարմիրշալյան