Միանգամյա սուտը ողբերգություն է, իսկ բազմակի սուտը պարզապես վիճակագրությու՞ն. Տեսանյութ, լուսանկարներ

Ինչպես գիտեք, հունվարի 1-ից խմելու ջուրը կթանկանա 20 դրամով։ Հիշեցնենք, որ վերջին խորհրդարանական ընտրությունների նախընտրական քարոզարշավի ժամանակ Նիկոլ Փաշինյանը խոստացել էր, որ մինչև 2024 թվականը Հայաստանում ջուրը չի թանկանա։ Այսինքն՝ արդեն այդ պահին Փաշինյանը գիտեր, որ ստում է հասարակությանը, բայց Նիկոլն այնքան էր ստել, որ «մի սուտ ավել, մի սուտ պակաս», մարդիկ արդեն չեն արձագանքում։

Իհարկե, նախկին իշխանության օրոք նույնպես ստում էին, բայց ոչ այնքան ու ոչ այսքան հաճախ։ Սակայն պարզվում է, որ սուտը նույնպես տարբեր է լինում, «սև ու սպիտակ» է լինում, բայց եթե մեր հասարակությունը շարունակի հանդուրժել Նիկոլ Փաշիյանի այս շարունակական ստերը, ապա մենք ոչ մի դրական ապագա չենք ունենա։ Այն հասարակությունը, որը հարմարվում է իր երկրի ղեկավարի ստերին, այդ հասարակությունը դատապարտված է կործանման։ Մարդկության ողջ պատմությունը դա է ցույց տալիս։

Ավելին, հնարավոր է, որ եկող տարվա փետրվարից էլեկրաէներգիան նույնպես թանկանա։

Հիշեցնենք, որ 2015 թվականին, երբ որոշում կայացվեց թանկացնել էլեկտրաէներգիան, Երեւանի կենտրոնում «մինի պատերազմ» սկսվեց։ Բոլորին պարզ էր, որ այս «մինի էլեկտրամայդանը» կազմակերպվել և ֆինանսավորվել էր դրսի ուժերի կողմից։

Հիշենք նաև, թե ինչ եղավ Երևանում, երբ հասարակական տրանսպորտով երթևեկությունը 100-ից ուզում էին թանկացնել հասցնելով 150 դրամի։

Այսօր բոլոր այն շրջանակները, որոնք 2015-ին դժգոհում էին էլեկտրաէներգիայի թանկացումից, կամ տրանսպորտի թանկացման դեմ, այսօր լռում են, ինչը նշանակում է, որ այդ շրջանակներն այն ժամանակ ոչ թե հանրային շահով են առաջնորդվել, այլ իրականացրել են դրսից պատվեր: Ինչը նշանակում է, որ ըստ էության իրենց այսօրվա լռությամբ բացահայտվում են այն մարդիկ, ովքեր Հայաստանում քաղաքական դաշտում շարժվել են դրսից եկած հրահանգներով։

Սա նույնպես լուրջ վերլուծության ու գնահատականի թեմա պետք է դառնա իշխանափոխությունից հետո։ «Դրսի հրամանով» գործողների անպատժելիությունը բերեց Ղարաբաղի փաստացի կորստին։ Մենք կորցրինք ոչ միայն Ղարաբաղը, այլև Հայաստանի ապագան կասկածի տակ դրվեց, ավելի քան 4000 երիտասարդ զոհվեց միայն այն պատճառով, որ մի քանի հարյուր սրիկաներ, դրսից պատվերներով իբր «հասարակական գործունեությամբ» էին զբաղվում, ինչի հետևանքով Հայաստանը հայտնվել է նմանատիպ իրավիճակում: Ինչպես գիտեք, հանցագործների անպատժելիությունը ծնում է նոր հանցագործություններ, և Հայաստանի ներկայիս վիճակը դրա վառ օրինակն է։

Եթե ​​մենք «վաղվա Հայաստանում» կրկին ինդուլգենցիաներ տանք այս հանցագործներին, դա կնշանակի, որ դրանով մենք նոր հիմք կդնենք, որ վաղը մյուս օրը Հայաստանում իշխանությունը զավթեն նոր «փողոցային մարդիկ», ինչի արդյունքում մենք կկորցնենք ոչ թե միայն Արցախը, այլ արդեն ամբողջ Հայաստանը:

Սա՛ է իրականությունը:

Դավիթ Մկրտչյան