Սաակաշվիլիին տեղափոխել են Թբիլիսիի դատարան. նրա կողմնակիցները նախատեսում են հանրահավաք անցկացնել դատարանի մոտ

Վրաստանի նախկին նախագահ Միխեիլ Սաակաշվիլիին երկուշաբթի տեղափոխել են դատարան, որտեղ տեղի կունենան 2007 թվականի նոյեմբերի 7-ի ցույցի կոշտ ցրման մասին գործով լսումները: Այս մասին հայտնում են վրացական ԶԼՄ-ները:

Ինչպես փոխանցւմ է Новости-Грузия-ն, Սաակաշվիլիի կողմնակիցները նախատեսում են դատալսումների ընթացքի զուգահեռ հանրահավաք անցկացնել դատարանի դիմաց: «Միասնական ազգային շարժում» խոշորագույն ընդդիմադիր կուսակցությունը ցույց է կազմակերպում Թբիլիսիի քաղաքային դատարանի մոտ:

Նախատեսվում է, որ ցույցը կմեկնարկի 11:00-ին:  

Հիշեցնենք, որ Միխեիլ Սաակաշվիլիին ձերբակալել են հոկտեմբերի 1-ին, երբ վերջինս վերադարձել է Վրաստան՝ երկրում հոկտեմբերի 2-ին կայացած ՏԻՄ ընտրություններում ընդդիմադիր ուժերին աջակցելու համար: Ձերբակալման օրվանից Սաակաշվիլին հացադուլ էր հայտարարել, որն ավարտել է 50-րդ օրը: Նախկին նախագահին երկրում հեռակա կարգով դատապարտել էին պատգամավորին ծեծի ենթարկելու և բանկիրի սպանության կազմակերպման համար: Բացի այդ, նրան մեղադրանք է ներկայացվել ևս մի քանի գործով, այդ թվում՝ պետական միջոցները մսխելու, լիազորությունների չարաշահման և երկրի սահմանն ապօրինաբար հատելու համար:

Աղբյուր՝ Tert.am