Հայրենիքը ես եմ. բացվել է ցուցահանդես. լուսանկարներ
Երեւանի թիվ 76 <<Արգենտինյան հանրապետություն>> դպրոցում բացվեց <<Հայրենիքը ես եմ>> խորագիրը կրող գեղարվեստական ցուցահանդեսը: Այն ներկայացնում է դպրոցի աշակերտների գեղանկարչական աշխատանքները:
Ցուցահանդեսի կազմակերպիչն է քանդակագործ, նկարիչ, արվեստագետ Նարեկ Հայրապետյանը:
Երեխաների գունառատ ստեղծագործություններում թեւածում է խաղաղությունը եւ սերը: Հայրենիքը մեկն է՝ Հայաստան եւ Արցախ, ինչի մասին էլ պատմում են երեխաների նկարները: Եվ որ ամենակարեւորն է՝ ոչինչ խաթարված չէ այս պատկերներում: Սա է երեխաների հայրենիքը՝ կապույտ երկինք, բարձր սարեր, հաղթանակի արծիվ եւ եռագույն օդապարիկներ, արցախյան պատկերներ, հայոց եկեղեցիներ, Արարատ, արեւ ու արեւահամ մրգեր: Մասնակիցները ունեն նաեւ միասնական աշխատանքներ: Մեկում նրանց բազմագույն ափերի դրոշմներն են, որ խորհրդանշում է նրանց միասնականությունը, իսկ մյուսում երեխաները գունավոր մատիտներով գրել են ցուցահանդեսի ընթացքում ծնված իրենց անմիջական մտքերը՝ <<Իմ հայրենիքը իմ զինվորն է>>, <<Իմ հայրենիքը իմ Արցախն է>, <<Իմ հայրենիքը իմ դպրոցն է, իմ ուսուցիչները, իմ ընկերները>>…
Մետաքսյա Ղեւոնդյան
Հետևեք մեզ Facebook-ում