Երեկ Կապանը նույնպես մերժեց Փաշինյանին
Կապանի տեղական ինքնակառավարման մարմինների ընտրություններում Նիկոլ Փաշինյանի թիմի պարտությունը ցույց տվեց մեկ պարզ ճշմարտություն, որ ամբողջ Սյունիքը լիովին մերժում է Նիկոլ Փաշինյանին և այն քաղաքականությունը, որը նա ու իր թիմը վարում են:
Սյունեցիների այս դիրքորոշումը հասկանալի է, քանի որ այն, ինչ տեղի է ունենում այստեղ 44-օրյա պատերազմից հետո, կարելի է բնութագրել մեկ բառով՝ դժոխք։ Մարդիկ ոչ միայն չեն հավատում Փաշինյանի խոստացած «ապագային», այլեւ սկսում են կասկածել՝ ողջ Հայաստանը ապագա ունի՞, թե՞ ոչ, քանի որ երևում է, որ Սյունիքի բոլոր խոշոր համայնքներում Փաշինյանը պարտվում է ոչ թե ինչ-որ մեծ ընդդիմադիր միավորմանն, այլ պարտվում է տեղական հեղինակավոր առաջնորդներին, որոնք հանդես են գալիս Փաշինյանից տարբերվող քաղաքական դիրքորոշմամբ։
Տեսնելով, թե ինչ էր սպասում Գորիսի, Սիսիանի և Քաջարանի քաղաքապետերին, որոնք հանդես էին գալիս որպես «Հայաստան» դաշինքի ներկայացուցիչներ, Մեղրիի և Կապանի քաղաքապետերը փորձեցին ներկայանալ մի փոքր այլ քաղաքական հարթակներով՝ Փաշինյանի իշխանությունների ռեպրեսիվ քայլերից խուսափելու համար, ինչն իր հերթին նշանակում է, որ այնտեղի ընդդիմությունն այս խնդրի մասին մտածելու շատ հիմնավոր պատճառ ունի։
Ինչ վերաբերում է այլ համայնքներում Նիկոլ Փաշինյանի թեկնածուների «հաղթանակներին», ապա միանշանակ կարելի է փաստել, որ այս համայնքներում Փաշիյանին ուժեղ ընդդիմադիր լիդերներ չեն ձևավորվել, քանի որ այս համայնքներում իրավիճակը տարբերվում է Սյունիքի իրավիճակից։ Սակայն նույնիսկ այստեղ ակնհայտ երևում էր ընդդիմության բացակայությունը։
Այս ամենից կարելի է մեկ եզրակացություն անել՝ այսօր Նիկոլ Փաշինյանի իշխանության գոյությունը պայմանավորված է միայն մեկ պատճառով՝ այսօր Հայաստանում չկա ազդեցիկ ընդդիմություն, որը ներկայացված լինի ամբողջ երկրում։ Հենց այս հանգամանքն է, որ թույլ է տալիս Փաշինյանի իշխանությունը գոյություն ունենալ նույնիսկ այս խայտառակ իրավիճակում, երբ Հայաստանը մաս -մաս բզկտվում է հարեւան պետության կողմից, իսկ հասարակության մեջ մեծանում է հավատի կորուստն պետության նկատմամբ։
Արտակ Հակոբյան
Սա՛ է իրականությունը:
Հետևեք մեզ Facebook-ում