Գորիս-Կապան մայրուղու հանձնման ֆոնին իշխանությունն անցել է Սյունիքում դպրոցների փակմանը. Տեսանյութ

Որակյալ կրթության հասանելիությունը մեծացնելու ծրագիրը սկսում ենք Սյունիքից՝ Կապանից, ինչի համար ներգրավվել են 9 մլրդ դրամի (գրեթե 19 մլն դոլար-խմբ․) չափով ներդրումներ։ Այս մասին այսօր՝ նոյեմբերի 11-ին, կառավարության նիստում ասաց ՀՀ վարչապետ Նիկոլ Փաշինյանը։ Նա հայտնեց, որ Սյունիքում տվյալ ծրագրի իրականացման մասին համապատասխան որոշումն ինքը ստորագրել է նոյեմբերի 4-ին։

Փաշինյանը նշեց, որ 2021 թվականին Սյունիքում երեխաների ընդամենը 5,6 տոկոսն է նախադպրոցական կրթություն ստանում։ «Հետազոտությունների համաձայն՝ այսօրվա պայմաններում Հայաստանի քաղաքացին կարող է բացահայտել իր ներուժի միայն 57 տոկոսը։ Տարրական դպրոցն ավարտելուց հետո աշակերտների 35 տոկոսը չի կարողանում կարդալ եւ հասկանալ պարզ տեքստեր։ 5 տարում պատրաստվում ենք կառուցել, վերանորոգել եւ հիմնանորոգել 300 դպրոց եւ 500 մանկապարտեզ։ Կարեւոր է մեր խոստումը՝ 3-6 տարեկան երեխաների 85 տոկոսը պետք է ներգրավվի նախադպրոցական հաստատություններում։ Մեր ծրագրի իրականացումը թույլ կտա մինչեւ 2030 թվականն ունենալ 293-տոկոսանոց ՀՆԱ»,-նշեց Փաշինյանը։

Իր հերթին, ԿԳՄՍ նախարար Վահրամ Դումանյանը հիշեցրեց, որ հանրապետությունում շատ դպրոցներ կան, որտեղ սովորում է մինչեւ 100 մարդ։ «Հայաստանում ընդհանուր առմամբ նման դպրոցները կազմում են 31,5 տոկոսը։ Սյունիքի մարզում դպրոցների 2/3-ն ունի մինչեւ 100 աշակերտ»,-ասաց նախարարը։ Կրթական հաստատությունների բարելավման ծրագրով, ըստ նախարարի, առաջարկվել է դպրոցների բարեփոխումներ իրականացնել Կապան խոշարացված համայնքում, որի կազմում ներառվել են Կապան քաղաքն ու հարակից 31 գյուղերը։  «Այսինքն՝ ընդամենը 13 դպրոց․ դրանից 5-ը կլինեն նոր դպրոցներ, մնացածը՝ կվերանորորգվեն։ Այդ կապակցությամբ առաջարկվում է կառուցել 8 ճանապարհ, ինչպես նաեւ աշակերտները կապահովվեն որակյալ տրանսպորտային միջոցներով»,-ընդգծեց նախարարը։

Նշվում է, որ ընդհանուր առմամբ ծրագրի շահառու կդառնա 1000 աշակերտ։