Ֆրանսիան խստացրել է պատվաստման անձնագիր ստանալու պահանջները

Ֆրանսիայի նախագահ Էմանուել Մակրոնը հայտարարել է կորոնավիրուսի դեմ պատվաստումների նոր պահանջների մասին՝ երկրում հիվանդության դեպքերի աճի պատճառով: Այս մասին չորեքշաբթի՝ նոյեմբերի 10-ին, հայտնում է Politico-ն։Ֆրանսիայում առանց պատվաստման երրորդ՝ խթանող չափաբաժնի տարեցների պատվաստման անձնագիրն անվավեր կհամարվի:

Դեկտեմբերի 15-ից 65 տարին լրացած անձանց պատվաստման անձնագրերն այլևս չեն գործում, եթե նրանք չեն վերապատվաստվել։ Առայժմ սա միակ տարիքային խումբն է, որը կարող է լրացուցիչ ներարկում ստանալ Ֆրանսիայում, սակայն 50-64 տարեկան մարդիկ ևս կկարողանան երրորդ անգամ պատվաստվել դեկտեմբերի սկզբին։ «Եթե դուք պատվաստվել եք ավելի քան վեց ամիս առաջ, խորհուրդ եմ տալիս բժշկի այցելություն նշանակել հենց հիմա»,- ասել է Մակրոնը։ Նշենք, որ սեպտեմբերին Ֆրանսիան սկսել է վերապատվաստման արշավ 65 տարեկանից բարձր մարդկանց համար։ Մինչ օրս 7,7 միլիոն մարդկանցից 3,3 միլիոնը ստացել է լրացուցիչ պատվաստանյութ: Պատվաստման անձնագիր, որը նաև հայտնի է որպես «կանաչ անցագիր», պահանջվում է ռեստորաններ, սրճարաններ, մարզասրահներ, կինոթատրոններ և թատրոններ մուտք գործելու, ինչպես նաև համերգների և սպորտային միջոցառումների մասնակցելու համար: