Ծնողների համբերության բաժակը լցվել է

«Հրապարակ»-ը գրում է. «Զոհված եւ անհետ կորած զինծառայողների ծնողներն ու հարազատները երեկ հերթական անգամ կառավարության շենքի մոտ էին ու բողոքի ակցիա էին իրականացնում։ Նրանք հայտարարում էին, որ իրենց համբերության բաժակն արդեն լցվել է, իրենց որդիների հետ տեղի ունեցածի համար մեղավորներն անպայման պետք է պատասխանատվության ենթարկվեն, բայց իրավապահները, անհասկանալի պատճառներով, հետեւողական չեն, չեն աշխատում, մատը մատին չեն տալիս, որ գոնե մի դավաճանի անուն ջրի երես դուրս գա։ Նրանք ակցիայի հենց սկզբից տեղեկացրել էին, որ կառավարության շենքի մոտ իրենց գտնվելու նպատակն ու պահանջը մեկն է՝ հանդիպում Փաշինյանի հետ։ Սակայն այն բանից հետո, երբ վարչապետի օգնականից իմացել էին, որ Փաշինյանն այդ պահին չի կարող ընդունել, իրենց ձայնն էլ ավելի լսելի դարձնելու համար փակել էին Տիգրան Մեծի պողոտան, ինչից հետո իրավիճակն ավելի էր լարվել:

Ոստիկանությունն ուժ կիրառելով, հրելով ծնողներին՝ բացել էր ճանապարհը։ «Խի՞ եք 10 հազար հոգով մեկի …ռը պահում։ Խի՞, իմաստը ո՞րն է , մենք գոնե կարա՞նք իմանանք, թե՞ չէ»,- դիմելով ոստիկաններին՝ ասում էր ակցիայի մասնակից ծնողներից մեկը։ «Լավ լսեք, դուք հիմա մեզնից շատ եք, դուք հիմա մի հատ վիժվածքի խոսքն եք կատարում՝ Նիկոլի: Եթե լավ տղա է, թող մի անգամ խոսի մեզ հետ»,- ասում էր ծնողներից մյուսը՝ կրկին դիմելով ոստիկաններին։

«Եթե այս կառավարությունը չի հասկանում, որ կարելի է ծնողի խոսքը լսել, գալ կոմպրոմիսի, ուրեմն մենք հիմիկվանից տեղեկացնում ենք, որ կարող ենք կոչ անել տարբեր քաղաքներում կենտրոնական փողոցները փակել»,- հավելում էր մեկ ուրիշը։ Զոհված զինծառայողներից մեկի ծնողը՝ Գագիկ Մխիթարյանը, լրագրողներին հետո հայտնեց, որ իրենք դադարեցրել են ակցիան մեկ պայմանով. «Մեր պահանջը վարչապետի հետ հանդիպումն է, ու վերջ։ Ոստիկանությունը եկավ, բանակցեցինք, փոխոստիկանապետի հետ հանդիպում կլինի, ըստ դրա կտեսնենք՝ ոստիկանությունը կարո՞ղ է միջամտել, որ վարչապետի հետ հանդիպումը կազմակերպեն, թե՞ ոչ։ Հիմա մենք պահանջում ենք հանդիպում մինչեւ մեկ ամսվա ընթացքում, չենք ասում՝ հենց այս պահին հանդիպենք: Ծնողների մի մասը պահանջում է, որ իրենց անհետ կորած որդիներին շուտ վերադարձնեն»։ Նշենք, որ ծնողներն օրերս հանդիպել էին նաեւ Քննչական կոմիտեի նախագահ Արգիշտի Քյարամյանի հետ։ Քննչականից փորձում էին մեզ համոզել ու պնդել, թե Քյարամյանը տվել է ծնողներին հուզող բոլոր հարցերի պատասխանը, մինչդեռ մեզ ասացին, որ իրականում հանդիպումն այլ ընթացք է ունեցել, ծնողները բավարարված չեն եղել պատասխաններից, այլապես երեկվա ակցիան անտրամաբանական կլիներ։

«Պրն Քյարամյանն ընդունել է ծնողներին, ու որեւէ դեպք չի եղել, որ հանդիպման ցանկություն լինի, ու նրանք մերժում ստանան։ Քյարամյանը եկել ու ընդունել է ծնողներին, ավելին՝ հանդիպումը ժամանակային առումով սահմանափակ չի եղել, մենք ժամանակ չենք դրել, ու, եթե չեմ սխալվում, մոտ 4 ժամ զրույց է եղել ծնողների հետ։ Մենք ասել ենք՝ կմնանք այնքան, մինչեւ բոլորիդ հարցերին կպատասխանենք։ Պատասխանել ենք բոլոր հարցերին, հանդիպումն էլ ավարտվել է այն ժամանակ, մինչեւ վերջին անձը հայտնել է, որ այլեւս հարցեր չունեն։ Ըստ էության, մարդիկ բավական գոհ են եղել իրենց տված հարցերի պատասխաններից, հանդիպումն այդպես է ավարտվել»,- այդ օրերին մեզ ասել էր ՀՀ Քննչական կոմիտեի զինվորական քննչական գլխավոր վարչության հատկապես կարեւոր գործերի քննության վարչության պետ Ռաֆայել Վարդանյանը»։