Թուրքիայի և ԱՄՆ-ի պաշտպանության նախարարները կհանդիպեն

ԱՄՆ-ի զինուժի գլխավոր շտաբի պետ, բանակի գեներալ Ջոզեփ Դունդորֆը հայտարարել է, որ գալիք շաբաթ նախատեսվում է Թուրքիայի և ԱՄՆ-ի պաշտպանության նախարարների հանդիպումը:
Ըստ թուրքական «Dunya» լրատվամիջոցի՝ Դունդորֆի խոսքերով, երկու երկրների պաշտպանության նախարարներ՝ Ֆիքրի Ըշըքը և Ջեյմս Մեթթիսը կքննարկեն ԱՄՆ-ի կողմից Սիրիայի քրդերին մատակարարվող զենքի հարցը:
Նա նաև հույս է հայտնել, որ «Իսլամական պետություն» (ԻՊ) ահաբեկչական կազմակերպության դեմ գործողությունների ժամանակ վնաս չեն հասցվի թուրք-ամերիկյան հարաբերություններին: ԱՄՆ-ի զինուժի գլխավոր շտաբի պետը վստահեցրել է, որ ԱՄՆ-ի կողմից Սիրիայում իրականացվող ցանկացած քայլի մասին Անկարան տեղյակ է և ոչինչ գաղտնի չի պահվում:
Ըստ նրա՝ այն զենքերը, որոնք տրամադրվում են Սիրիայի քրդական ուժերին օգտագործվելու են միայն Սիրիայի Ռաքա քաղաքի ազատագրման օպերացիայի շրջանակներում:
Նշենք, որ Ռաքքան այժմ գտնվում է ԻՊ-ի վերահսկողության տակ:

Աղբյուր` Ermenihaber.am