Զբոսաշրջիկներին բաժանվել են քառալեզու ծալաթերթիկներ

«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրեն Արա Թարվերդյանը, ՊՈԱԿ-ի աշխատակիցները և մի խումբ երիտասարդներ յուրօրինակ նախաձեռնությամբ են հանդես եկել: Օպերայի և բալետի ազգային ակադեմիական թատրոնի հարակից տարածքում, Հյուսիսային պողոտայում, Հանրապետության հրապարակում նրանք մայրաքաղաք ժամանած զբոսաշրջիկներին բաժանել են «Գառնի», «Զվարթնոց», «Մեծամոր», «Լոռի բերդ» քաղաքատեղի», «Արփի» բնապատմական, «Գոշավանք», «Զորաց քարեր» բնակատեղի», «Գլաձորի համալսարան» արգելոցների և արգելոց-թանգարանների մասին պատմող տեղեկատվական քառալեզու (անգլերեն, ռուսերեն, ֆրանսերեն, պարսկերեն) ծալաթերթիկներ (ֆլայերներ):

Հայաստանի գեղեցկությամբ հիացած օտարերկրացի հյուրերն ուշադրությամբ են լսել հուշարձանների վերաբերյալ ՊՈԱԿ-ի տնօրեն Արա Թարվերդյանի և աշխատակիցների փոխանցած տեղեկատվությունը, առավել հետաքրքրասերները նաև բազմաբովանդակ հարցեր են ուղղել: Ավստրալիայից, Պարսկաստանից, Իսպանիայից, Հնդկաստանից, Անգլիայից, Չինաստանից, Ռուսաստանի Դաշնությունից ժամանած զբոսաշրջիկներից շատերն անկեղծացել են, որ հիացած են հայկական ճարտարապետությամբ: Նրանց փոխանցմամբ եղել էին ՊՈԱԿ-ի մասնաճյուղ որոշ արգելոց-թանգարաններում և անպայման կլրացնեն բացը` մյուս թանգարաններ նույնպես այցելելով ծանոթանալ մեր պատմության քարե մատյաններին:

«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի լրատվության բաժին