Եզրաս սրբազանը Գարիկ Մարտիրոսյանին նվիրեց Հ․Այվազովսկու հոգևոր թեմաներով ստեղծագործությունների գիրք-ալբոմը

Օրերս Մոսկվայի եկեղեցական համալիր էր այցելել հայտնի հումորիստ, հաղորդավար Գարիկ Մարտիրոսյանը։ 

Սուրբ Պայծառակերպություն Մայր տաճարում մոմավառությունից հետո Գ․ Մարտիրոսյանն առաջնորդարանում հանդիպեց Տեր Եզրաս արքեպիսկոպոս Ներսիսյանին։ 

Մտերմիկ զրույցի ընթացքում խոսվեց սփյուռքում Հայ Եկեղեցու առաքելության մասին։

Սրբազան հայրը ներկայացրեց թեմի հովանու ներքո գործող կրթական կենտրոնները, որտեղ հազարավոր սաներ հոգևոր և ազգային կրթություն են ստանում, Ռուսաստանի Դաշնության տարբեր քաղաքներում և Մայր հայրենիքում մասնակցում մրցույթների ու փառատոների։

Խոսվեց նաև Հայաստանին և Արցախին բարեգործական ծրագրերով օգնելու, հետպատերազմյան շրջանում մեր հայրենակիցներին հոգեբանական աջակցություն, տեղահանված արցախցի ընտանիքներին սոցիալական օգնություն ցուցաբերելու կարևորության մասին։

Հանդիպման ավարտին թեմակալ առաջնորդը Գարիկ Մարտիրոսյանին նվիրեց վերջերս վերահրատարակված «Հոգևոր թեմաները Հ․Այվազովսկու ստեղծագործություններում» գիրքը-ալբոմը։