Փաշինյանը համաձա՞յն է, որ Իրանն ու Հայաստանը համատեղ զբաղվել են նարկոթրաֆիկով. Տեսանյութ

Հոկտեմբերի 15-ին, ԱՊՀ նիստի ժամանակ, Ադրբեջանի նախագահ Իլհամ Ալիեւը հանդես եկավ մի շարք լկտի հայտարարություններով: Սկզբում նա հայտարարեց, որ հայ ռազմագերիներն իր համար «ռազմագերիներ» չեն, այլ դիվերսանտներ են, ուստի դրանք չեն կարող պաշտպանվել միջազգային իրավունքով:  

Այնուամենայնիվ, ավելի հետաքրքիր էր նրա երկրորդ թեզը, ու ըստ նրա որոշ «հիմնավորումների», որ վերջին 30 տարում Հայաստանն ու Իրանը միասին ներգրավված են եղել թմրանյութերի ապօրինի շրջանառության մեջ: Այսքանից հետո նա սկսեց շանտաժի ենթարկել Հայաստանը եւ ասաց, որ եթե Երեւանը չկնքի Ադրբեջանի հետ խաղաղության պայմանագիր, ապա այն կկորցնի իր պատմական շանսը:

Սովորաբար, այս կարգի մեղադրանքներից հետո Հայաստանի նախկին ղեկավարները «ոտքի վրա» խմբագրում էին իրենց ելույթները և փորձում արձագանքել Ադրբեջանի նախագահի անհիմն հայտարարություններին: Հատկապես դա վերաբերվում էր ադրբեջանական կողմի այն հայտարարություններին, որոնք նախկինում մինչև որոշակի պահն այդքան բարձր մակարդակով չէին արտահայտվում:

Եթե ​​նախկինում Ալիևը մեր գերիներին անվանում էր դիվերսանտներ, իսկ հայկական կողմն արձագանքում էր Ալիևին, ապա այն հայտարարությունը, թե իբր Հայաստանն ու Իրանը համատեղ զբաղվել են թմրամիջոցների ապօրինի շրջանառությամբ, «նորամուծություն» էր, և անկախ նրանից, թե ինչպես Փաշինյանը փորձեց պատասխանել Ալիևի այս մեղադրանքին, միևնույն է, պետք է հասկանաք, որ Ալիևն իր մեղադրանքներն փաստացի հիմնավորել է նույն Նիկոլ Փաշինյանի խոսքերով, ով նախկինում հայտարարել էր, որ Սյունիքի նոր մարզպետ նշանակելիս իր հիմնական խնդիրներից մեկը պետք է լինի «Սյունիքում նարկոթրաֆիկի ողնաշարը ջարդելը»:

Այսպես է լինում, երբ պետության ղեկավարը, իր վարկյանական պոպուլիստական ​​հարցերը լուծելու համար, չի հասկանում, թե ինչպիսի վնաս է հասցնում երկրի իմիջին նման անպատասխանատու հայտարարություններով:

Մեղադրանքներն, որ այսօր Ալիևը հնչեցրեց Հայաստանի և Իրանի հասցեին, որոնցում փաստացի հղում արեց Փաշինյանի՝ նախկինում ասված խոսքերին, այս փաստի վառ ապացույցն են:

Սա՛ է իրականությունը:

Դավիթ Մկրտչյան