Արցախում նոր պատերազմ ՉԻ սկսվել

Արցախում նոր պատերազմ ՉԻ սկսվել։ Թշնամին սադրանքի է դիմել հատկապես Մարտունու մի քանի դիրքերի ուղղությամբ, նաև կրակել են Շոշի և Մեծ շենի վրա։ 

Հայկական կողմը որևէ մարդկային կորուստ չունի, թեպետ ունենք 2 ծանր վիրավոր, հուսանք, որ մեր եղբայր զինվորների առողջությունը արագ կվերականգնվի։

22:00-ից հետո իրավիճակը հանգիստ է։

Սիրելի հայրենակիցներ, ինքս խուսափում էի լրատվություն հաղորդել մինչև դրա վերջնական ճշգրտված լինելը։ ՄԻՊ Արման Թաթոյանն այդ առումով տեղեկատվության ամենավստահելի աղբյուրն է։

Ընդհանուր առմամբ խուճապի և մեծ անհանգստության կարիք չկա։ Արցախի շփման գծի ընդամենը 2-3 վայրում է թշնամին կրակել, սուտ են համատարած մարտերի մասին հրապարակումները։ Հայկական բանակը կառավարում է իրավիճակը, թշնամուն մեր զինվորները համարժեք պատասխան են տվել։ Նրանց զոհերի մասին չեմ խոսում, քանի որ փաստեր չունեմ, բայց ընկերներս պնդում են, որ ադրբեջանական սոցհարթակներում 2 ադրբեջանցի զոհի մասին է խոսվում։ Չեմ կարող հաստատել։

Կրկնում եմ, այս պահին հանդարտ է, ռուս խաղաղապահները տեղեկացված ու տեղակայված են նշված վայրերում։

Եթե փորձենք սառը գլխով վերլուծել եղածը, ապա պետք է Ադրբեջանի այս սադրանքը ուղիղ կապենք Իրանի սահմանային կոշտության, Բաքվին ու Անկարային ուղղված զգուշացումների, նաև Ռուսաստանի կողմից երեկ և այսօր դիվանագիտական մակարդակում արված կոշտ քայլերի հետ։

Այս կրակոցներով Ադրբեջանը և Թուրքիան փորձում են փոքր անկայունություն հրահրել և կասկածի տակ դնել ռուս խաղաղապահների արդյունավետությունը, և միաժամանակ Իրանին յուրատեսակ ուղերձ հղել։

Արցախում նոր պատերազմ ՉԻ սկսվել ու գոնե հիմա չի սկսվի։ Ամուր լինենք հոգով և պատրաստվենք քիչ ավելի ուշ ժամանակներում սպասվող գործողություններին։

Նաիրի Հոխիկյանի Ֆեյսբուքյան էջից