Ադրբեջանն ազատ է արձակել իրանցի վարորդներին, որոնց ձերբակալել էր հայկական տարածքից

Ադրբեջանն ազատ է արձակել իրանցի վարորդներին, ովքեր ձերբակալվել էին շուրջ 1 ամիս առաջ ադրբեջանական ուժայինների կողմից՝ ՀՀ Սյունիքի մարզում՝ Գորիս-Կապան ճանապարհին:

Ըստ իրանական «Մեհր» գործակալության, Ադրբեջանի և Իրանի արտաքին գործերի նախարարների միջև հեռախոսազրույցից մեկ օր անց Բաքուն ազատ է արձակել իրանցի վարորդներին:

«Անցյալ գիշեր կայացած հեռախոսազրույցում Իրանի արտգործնախարար Հոսեյն Ամիր Աբդոլլահիանն իր ադրբեջանցի գործընկեր Ջեյհուն Բայրամովին ասել էր, որ չպետք է խաթարվեն բարեկամական հարաբերությունները Թեհրանի և Բաքվի միջև»,- նշում է գործակալությունը:

Հիշեցնենք՝ սեպտեմբերի 9-ից Հայաստանի Հանրապետության Սյունիքի մարզի Որոտան գյուղի մոտ ադրբեջանական ոստիկանության հենակետ է տեղակայվել, իսկ սեպտեմբերի 11-ից ադրբեջանցիները ելքի ու մուտքի տուրքեր են պահանջում իրանական բեռնատարներից։