Արարատում հերթը հասել է սփյուռքահայերին
«Հրապարակ» թերթը գրում է. «Արարատի մարզպետ Արամայիս Գրիգորյանն իր դեմ է հանել անգամ մեր սփյուռքահայ հայրենակիցներին: Արդեն մի քանի ամիս է՝ մարզում հաշվեհարդար են տեսնում Հովիկ Աբրահամյանի թիմակիցների նկատմամբ, աշխատանքից ազատվում են դպրոցի տնօրեններ, մարզպետարանի աշխատակիցներ, որոնց մասին մամուլը գրում է:
Վերջերս էլ մարզպետարանի կողմից իրականացված աուդիտի արդյունքում ազատվեց Արտաշատի Հայկազ Ճգնավորյանի անվան թիվ 5 դպրոցի տնօրեն Ռուզաննա Հայրապետյանը: Պարզվում է, սակայն, մարզպետը տնօրենին ազատելով չի սահմանափակվել, աուդիտ իրականացնողները քննության տակ են առել նաև դպրոցի մեկենաս, Ավստրիայում բնակվող Արշալույս Ճգնավորյանի և նախկին տնօրենի իրականացրած ֆինանսական գործարքների փաստաթղթերը, մինչդեռ աջակցությունը բարեգործական հիմունքներով է եղել, և մարզպետարանն այդ փաստաթղթերն ստուգելու իրավասություն չունի: Ի դեպ, մեկենասը Լորիս Ճգնավորյանի քույրն է, և նրա հոր անունով է դպրոցն անվանակոչված:
Տեղեկություններ կան, որ Արշալույս Ճգնավորյանը հեռախոսազրույց է ունեցել Արամայիս Գրիգորյանի հետ, հորդորել վերջ դնել այդ գործընթացին: Նա օգոստոսին Հայաստան է գալու, և, եթե իրադարձությունները չընթանան իր համար ցանկալի հունով, անձամբ կդիմի Սերժ Սարգսյանին:
Ռուզաննա Հայրապետյանը, հիշեցնենք, ամիսներ առաջ ՀՀԿ Արարատի տարածքային կառույցի կանանց խորհրդի նախագահն էր, սակայն կառույցից և կուսակցությունից դուրս եկավ Հովիկ Աբրահամյանի դուրս գալուց հետո»:
Մանրամասները՝ թերթի այսօրվա համարում:
Հետևեք մեզ Facebook-ում