Մահացածների մահճակալները դատարկ չեն մնում, պատվաստման վտանգներն ու միֆերը. Տեսանյութ

Պատվաստվե՞լ, թե՞ ոչ՝ յուրաքանչյուրի կշռադատված որոշումը պետք է լինի: Մեր երկրի քաղաքացիների դեռ միայն 13 տոկոսն է ստացել հակակորոնա պատվաստանյութի երկու դեղաչափ: Առողջապահության փոխնախարարն ասել է՝ սա ամենացածր ցուցանիշն է տարածաշրջանում:

Վերջին տվյալով՝ կորոնա-բաժանմունքներ կան երկրի 18 բժշկական կենտրոններում: Եղած 2156 մահճակալից 2006-ը զբաղված է: Թոքերի արհեստական օդափոխման սարքով է շնչում 68 քաղաքացի, ծայրահեղ ծանր վիճակում է 169-ը:

Պատվաստված մարդու օրգանիզմ էլ կարող է թագավարակ ընկնել, բայց գրեթե չկա դեպք, որ պատվաստված վարակակիրը վերակենդանացման բաժանմունքում հայտնվի: Մեր երկրում միայն մեկ վակցինացված քաղաքացի է մահացել, բայց նա, ըստ առողջապահության նախարարության, պատվաստանյութի երկրորդ դեղաչափը ստացել է քովիդով վարակվելուց հետո միայն:

Խնդիրն ավելի է բարդանում հղիների դեպքում: Չհաստատված ու չհերքված վարկած կա, թե հակա-քովիդ վակցինաները անպտղություն կարող են առաջացնել: Որոշ մասնագետներ պնդում են, թե այս վարկածի ճշմարտացիությունը հասկանալ հնարավոր կլինի ներարկումից առնվազն 15 տարի անց, իսկ առողջապահության պատասխանատուները այս պահին խնդիր ունեն փրկելու հղիների կյանքը: Քովիդ 19-ը արդեն 9 հղի կնոջ կյանք է խլել: