Թեհրանի հուշումները՝ Երևանին. Սյունիքի անվտանգությունը Իրանի «կարմիր գիծն» է. Տեսանյութ

Խաղաղության դարաշրջան է խոստանում տարածաշրջանին Նիկոլ Փաշինյանը իր՝ պատերազմից հետո ձևավորած անվրդով, հանգիստ ձայնով: Չի գոռում, դեմքի մկանները չի աշխատեցնում, խաղաղվել է ու խաղաղություն է խոստանում:

Էլ ի՞նչ է երբևէ խոստացել Փաշինյանը: Որ կվերացնի տեսանկարահանող ու արագություն չափող սարքերը, որովհետև քաղաքացին տուգանքի մատերիալ չէ, որ վենդետա չի լինի, որ գազի գինը կիջնի, իսկ ջրինը՝ առանվազն մինչև 2024 թվականը նույնը կմնա: Այս բոլոր խոստումները չեն կատարվել, ավելին՝ կատարվել է ճիշտ հակառակը: Տասնյակ նման օրինակներ իմացող հայ մարդն ի՞նչ էր զգում այն օրը, երբ Ստեփանակերտի հրապարակում Նիկոլ Փաշինյանը գոռում էր՝ Արցախը Հայաստան է և վերջ: Գլխի ընկնո՞ւմ էր հայությունը, որ ժողովրդի մեջքի հետևում Արցախի հարցով որևէ որոշում չկայացնելու խոստում տված մարդը մի գիշերում կստորագրի կապիտուլյացիան, կկորցնենք Արցախի 75 տոկոսը, իսկ մնացած 25 տոկոսի վրա ռուս խաղաղապահները կհսկեն խարխուլ խաղաղությունը:

Փորձագետներին վախեցնում է Փաշինյանի ամեն նոր խոստում, որքան մեծ է նրա խոստումը՝ այնքան ավերիչ են հետևանքները: Տարածաշրջանի համար խաղաղության դարաշրջան բացելու նրա նոր զբաղմունքը մասնագետներին ստիպում է մտածել՝ Կովկասի լեռները պայթեցնող նոր՝ ավերիչ պատերազմի իրական վտանգի մասին: