Սերժ Սարգսյանը վայր է դրել իր լիազորությունները

Դատելով իշխանությունների հովանու ներքո գործող լրատվամիջոցների հրապարակումներից¸ «քաղաքագետների և վերլուծաբանների» արտահայտած մտքերից¸ ստացվում է մի իրավիճակ¸ ըստ որի` Սերժ Սարգսյանն արդեն վաղուց վայր է դրել իր լիազորությունները և չի տիրապետում այն ամենին¸ ինչը կատարվում է երկրում վերջին տարիների ընթացքում:

Դատեք ինքներդ.

1. Իշխանականները Մարտի 1-ի պատասխանատուներ են հռչակել Ռոբերտ Քոչարյանին¸ Գագիկ Ծառուկյանի թիկնապահներին¸ Վարդան Օսկանյանին¸ հիմա էլ Սեյրան Օհանյանին:

2. Տնտեսության անմխիթար վիճակի համար պատասխանատու է Ռոբերտ Քոչարյանից մնացած ժառանգությունը¸ 2008-2010 թվականների տնտեսական ճգնաժամը¸ օլիգարխները և ղարաբաղյան հարցի լուծված չլինելը¸ Հովիկ Աբրահամայանը¸ իսկ հիմա նաև Կարեն Կարապետյանը:

3. Հայաստանի՝ ԵԱՏՄ անդամակցելու պատասխանատվությունը կրում են ոչ իշխանական ուժերը` ԲՀԿ-ի¸ ՀԱԿ-ի և «Ժառանգության» գլխավորությամբ ¸ ինչպես նաև «չար Վլադիմիր Պուտինը»:

4.Ընտրությունները կեղծում են օլիգարխները¸ թաղային հեղինակությունները¸ մարզպետներն ու գյուղապետերը¸ բայց իրենք այդ ամենն անում են բացառապես սեփական նախաձեռնությամբ:

5. Ապրիլյան պատերազմի ձախողումների համար պատասխանատու է Սեյրան Օհանյանը:

Մոտավորապես այսպիսի պատկեր ենք տեսնում՝ վերլուծելով իշախանական շրջանակների կողմից ներկայացված գաղափարները¸ սակայն իրականությունը ճիշտ հակառակն է: Վերջ ի վերջո մարտի 1-ի գնով իշխանության եկավ Սերժ Սարգսյանը, և եթե չլիներ մարտի 1-ի ողբերգությունը¸ Սարգսյանը նախագահի աթոռը չէր տեսնի: Տնտեսության կոլապսային վիճակը պայամանավորաված է նրա գերկենտրոնացմամբ և նրանով¸ որ Սարգսյանի մոտ բացակայում է քաղաքական կամքը՝ ազատականացնելու հայրենի տնտեսական շուկան:

Ապրիլյան պատերազմում մեր զգալի կորուստները պայմանավորված են նրանով¸ որ վերջին տարիներին Հայաստանի տնտեսությունում գրանցված ճգնաժամը¸ ինչպես նաև սարսափելի տեմպերի հասնող արտագաղթը¸ չէին կարող իրենց ազդեցությունը չունենալ հայաստանյան բանակի մարտունակության վրա¸ իսկ թե ինչու չէր զարգացել Հայաստանի տնտսությունը, արդեն նշեցինք: Հայաստանը հայտնվեց ԵԱՏՄ-ի «չուլանում» այն պատճառով¸ որ Սերժ Սարգսյանն՝ առանց հնարավոր հետևանքները վերլուծելու¸ 3,5 տարի բանակցեց Եվրոմիության հետ Ասոցացաման պայամանագրի շուրջ¸ ինչի արդյունքում ոչ միայն սրվեցին մեր հարաբերությունները Ռուսաստանի հետ¸ այլ նաև բարելավվեցին Ռուսաստանի հարաբերությունները մեր թշնամի Ադրբեջանի նետ:

Իրականությունը հենց այսպիսին է: Եվ մեր երկրում գրանցված բոլոր խոշոր բացթողումների համար պատասխանատվությունը կրում է անձնապես Սերժ Սարգսյանը¸ սակայն եթե իշխանական շրջանակները շարունակում են պնդել¸ որ Սերժ Սարգսյանը վայր է դրել իր լիազորությունները և կապ չունի երկրում տեղի ունեցող կարևորագույն իրադարձույթունների հետ¸ ապա մեր բոլորի նպատակն է դառնում Ազգային ժողովի ընտրությունների ժամանակ ի կատար ածել իշխանականների այս թեզը:

Բենիամին Մաթևոսյան