Ճոճվող սրերի տարածաշրջանում Հայաստանը մանրադրամ է դառնում. Տեսանյութ

Օդում կախված լուրերի համաձայն՝ Երևան՝ գաղտնի բանակցությունների էր եկել Թուրքիայի նախագահի բանագնացը, ամենայն հավանականությամբ՝ Էրդողանի պաշտոնական ներկայացուցիչ Իբրահիմ Քալինը։

Հայաստանի ԱԽՔ Արմեն Գրիգորյանն ուղիղ ասել էր, որ Հայաստանը պետք է կարգավորի հարաբերությունները Թուրքիայի հետ: Դա պետք է լինի աստիճանաբար, առանց նախապայմանների ու Ադրբեջանի հետ հարաբերություններից տարանջատված։ Գրիգորյանը նաև ակնարկել էր, որ առաջիկայում հնարավոր են թուրք և հայ պաշտոնյանների երկխոսություններ բարձր ու բարձրագույն մակարդակով:

Բարձրագույնն այս դեպքում Նիկոլ Փաշինյանը կարող է լինել, որ պատերազմից հետո դրական ազդակներ է ստանում և ուղարկում Էրդողանին: Վրաստանի վարչապետի միջոցով առաջարկում հանդիպել: Ու այս ամենը Փաշինյանն անում է տարածաշրջանում խաղաղության դարաշրջան բացելու քարոզչական քողի տակ, ու չնկատելու տալիս, որ տարածաշրջանի մյուս պետությունները ամեն օր փայլեցնում են իրենց սրերն ու պատրաստվում պատերազմի:

Առաջին կրակը կարող է բռնկվել հենց մեր քթի տակ՝ Սյունիքի դարպասների մոտ՝ իրանակա-ադրբեջանական բախումներով: Իրանում ազդեցիկ վերլուծաբանի համարում ունեցող Շուայբ Բահմանը «Հայլուրին» բացառիկ մեկնաբանություններ է տվել, թե արդյոք իր երկու քաղաքացիներին վերադարձնելու համար Իրանը կգնա՞ բացահայտ առճակատման Ադրբեջանի հետ, որին այդ ճակատագրական պահին մենակ չեն թողնի Թուրքիան ու Պակիստանը: